अर्थतन्त्र

नयाँ रेकर्ड कायम गर्दै उकालाे यात्रामा नेप्से

• गाउँ सहर संवाददाता
• २८ श्रावण बिहीबार, २०७८ | १६:५४:०० मा प्रकाशित

काठमाडौं । साताको अन्तिम कारोबार दिन बिहीबार सेयर बजार परिसूचक नेप्सेले नयाँ रेकर्ड कायम गरेकाे छ । नेप्सेले लगातार तेस्रो कारोबार दिन नयाँ रकेर्ड कायम गरेको छ । गत मंगलबारदेखि नयाँ रेकर्ड बनाउन थालेको नेप्से बिहीबार १६.४१ अंक बढेर हालसम्मकै उच्च ३१७९.०० विन्दुमा पुगेको छ।

नेप्सेसँगै यस दिन कारोबार रकममा पनि वृद्धि भएको छ । यस दिन २२५ कम्पनीको १ लाख ५४ हजार ६६० पटकको कारोबारमा १७ अर्ब ५१ करोड ३२ लाख ७६ हजार रुपैयाँ बराबरको ३ करोड ६६ लाख ८ हजार कित्ता शेयर खरिदबिक्री भएको छ ।

यो दिन ११२ वटा कम्पनीको सेयर मूल्य बढेको छ भने १०४ वटा कम्पनीको सेयर मूल्य घटेको छ । साथै ८ वटा कम्पनीको सेयर मूल्य स्थिर छ । यो दिनको कारोबारमा विकास बैंक उपसमूह ६.४० प्रतिशतले बढेकाे छ ।

यस दिन ७ कम्पनीको शेयर सकारात्मक सर्किट लेभलमा कारोबार भएको छ। यस दिन रुरु जलविद्युत, कामना सेवा विकास बैंक, माउन्टेन इनर्जी, जीवन विकास लघुवित्त, महालक्ष्मी विकास बैंक, साइन रेशुङ्गा डेभलपमेन्ट बैंक र यूनियन लाइफ इन्स्योरेन्सको शेयर सकारात्मक सर्किट लेभलमा कारोबार भएको हो ।

बिहीबारको बजारमा ९ कम्पनीका लगानीकर्ताले ३ प्रतिशत धेरैका दरले गुमाएका छन् । पाँचथर पावर कम्पनीको शेयर मूल्यमा सार्वधिक गिरावट आएको छ । यसदिन कम्पनीको शेयर मूल्य ३.९९ प्रतिशतलले घटेको छ ।

कारोबार रकमका आधारमा यस दिन अपर तामाकोशी शीर्ष स्थानमा रहेको छ । सो कम्पनीको यस दिन ६२ करोड ७९ लाख रुपैयाँभन्दा बढीको शेयर खरिदबिक्री भएको छ ।