अर्थतन्त्र

कारोबार बढेपनि बढेन नेप्से

• गाउँ सहर संवाददाता
• ७ जेठ बिहीबार, २०८३ | १५:३०:०० मा प्रकाशित

काठमाडौं । अघिल्लो दिन ३० अंक बढेको सेयर बजार बिहीबार १२.३६ अंक घटेको छ । यो कमीपछि नेप्से परिसूचक २७४२ अंकमा कायम भएको छ ।

बजार घट्दा कारोबार रकम केही बढेको छ । अघिल्लो दिन ३ अर्ब ८२ करोडको कारोबार भएकोमा आज ३ अर्ब ८९ करोडको भयो । आज बजार दिनभरजसो रातो अंकमा रह्यो ।

७२ कम्पनीको मूल्य बढ्यो भने १८८ को घट्यो । ९ कम्पनीको मूल्य स्थिर रह्यो । सबैजसो समूहका सूचक घटेका छन् । यद्यपि सबै समूहका सूचकको गिरावट दर १ प्रतिशतभन्दा कम रह्यो ।

बुंगल हाइड्रोपावरको मूल्य सबैभन्दा धेरै ६.१८ प्रतिशत बढ्यो । मूल्य धेरै बढ्नेमा आज बैंक तथा वित्तीय संस्थाका डिबेन्चर अगाडि रहे । अपर लोहोरेखोलाको मूल्य १४.९५ प्रतिशत घट्यो । त्यस्तै झापा इनर्जीको ८.१२, माउन्टेन हाइड्रो नेपालको ७.४० तथा सिटी होटलको मूल्य ३.८० प्रतिशत घट्यो ।

आज धेरै कारोबार भएका पाँच कम्पनीमा आँखुखोला जलविद्युत्, रिडी पावर, बुंगल हाइड्रोपावर, एनआरएन इन्फ्रास्ट्रक्चर र फर्स्ट माइक्रोफाइनान्स छन् ।