अर्थतन्त्र

सेयर बजारमा दाेहाेराे अंककाे हरियाली, लगानीकर्ता थाेरै उत्साहित

काठमाडौँ । नेपाल स्टक एक्सचेञ्ज (नेप्से) साताको कारोबारको दोस्रो दिन आज सोमबार उच्च अंककाे हरियाली छाएकाे छ । आइतबार दोहोरो अंकले घटेको नेप्से सोमबार भने करिब ५६ अंकले बढेको हो ।

आज नेप्से ५५.८८ अंकले बढेर दुई हजार ६५ दशमलब ८९ विन्दुमा बन्द भएको छ । त्यस्तै, आज नेप्सेमा दुई अर्ब ४३ करोड २९ लाख रुपैयाँ बराबरको कारोबार भएको छ ।

आज कारोबार भएका कम्पनीमध्ये १८० वटा कम्पनीको शेयरमूल्य बढेको छ भने ४ वटा कम्पनीको शेयरमूल्य घटेको छ । यसमध्ये तीन कम्पनीको शेयरमूल्य १० प्रतिशतले बढेको छ भने १० कम्पनीको शेयरमूल्य ९ प्रतिशत भन्दा बढीले बढेको छ । सोमबार श्री इन्भेष्टमेन्ट फाइनान्स, मल्टीपर्पोज फाइनान्स र राधी विद्युत कम्पनीको शेयरमूल्य १० प्रतिशतले बढेको छ ।

त्यस्तै, सोमबार रिभरफल्स पावर कम्पनी, पञ्चकन्यामाई हाइड्रोपावर, अप्पर हेवाखोला हाइड्रोपावर, राष्ट्र उत्थान लघुवित्त वित्तीय संस्था र हिमालयन उर्जा विकास कम्पनीको पनि शेयर मूल्य ९ प्रतिशत भन्दा बढीले बढेको छ । यस्तै, आज सेन्ट्रल फाइनान्स कम्पनी, गोर्खाज फाइनान्स, आइसीएफसी फाइनान्स, युनिभर्सल पावर कम्पनी र दोर्दीखोला जलविद्युत कम्पनीको शेयरमूल्यमा उच्च वृद्धि भएको छ । यी कम्पनीको शेयरमूल्य आज ९ प्रतिशत भन्दा बढीले बढेको छ ।

नेप्सेका अनुसार आज रिडी पावर कम्पनीको शेयरमूल्यमा सबैभन्दा बढी गिरावट भएको छ । यस कम्पनीको शेयरमूल्य ९ प्रतिशत भन्दा बढीले घटेको हो । त्यस्तै, कारोबारको आधारमा आज सबैभन्दा बढी शिवम् सिमेन्टको भएको छ । यसको आज २१ करोड २ लाख भन्दा बढीको कारोबार भएको छ ।

गाउँ सहर संवाददाता

तपाईँको मत