अर्थतन्त्र

बुधबार लगानीकर्ताहरू जलविद्युत कम्पनीतिर आकर्षित, नेप्से भने सामान्य अंकले घट्याे

• गाउँ सहर संवाददाता
• २२ बैशाख बुधबार, २०७८ | १५:५३:०० मा प्रकाशित

काठमाडाैं । बुधबार नेप्से परिसूचकमा सामान्य गिरावट भइ बन्द भएकाे छ । 

यसदिन दिन शेयर बजार परिसूचक घटेपनि १६ कम्वपनीको शेयरमूल्यमा सकारात्मक सर्किट लागेर कारोबार भएको छ । हाइड्रोपावर कम्पनीहरुमा लगानीकर्ताको आकर्षण कायमै रहेको देखिएको छ ।

बुधबार नेप्से सूचक ५.०९ अंकले घटेर २६४९.६० विन्दुमा झरेको छ भने सेन्सेटिभ सूचक पनि १.६३ अंकले घटेर ४७३.८१ विन्दुमा झरेको छ ।

यस दिन २१८ वटा कम्पनीको १ करोड ४८ लाख ६७ हजार ९९५ कित्ता शेयर ६ अर्ब २१ करोड ६८ लाख १४ हजार ३१३ रुपैयाँमा खरिद बिक्री भएको छ ।

 

यो दिनको कारोबा रिडी हाइड्रोपावर र राइराङ हाइड्रोपावर कम्पनीको सेयर मूल्यमा १० प्रतिशतले सकारात्मक सर्किट लागेको छ । त्यसैगरी विशाल बजार कम्पनीको ९.९९ प्रतिशत, महिला लघुवित्तको ९.९८ प्रतिशत र सिंगटी इनर्जी कम्पनीको ९.९८ प्रतिशतले सेयर मूल्यमा उछाल आएको छ ।

त्यसैगरी छ्याङदी हाइड्रोपावर ९.९७ प्रतिशत, समता घरेलू लघुवित्तको ९.९२ प्रतिशत, युनियन हाइड्रोपावरको ९.८० प्रतिशत, जोशी हाइड्रोपावरको ९.७२ प्रतिशत र बरुण हाइड्रोपावरको ९.७२ प्रतिशतले सेयर मूल्य बढेको छ ।

त्यसैगरी सबैभन्दा बढी गुमाउने कम्पनीमा आशा लघुवित्त, लक्ष्मी लघुवित्त, इन्फिनिटी लघुवित्त, सबैको लघुवित्त, स्वाभिमान लघुवित्तको सेयर मूल्य घटेको छ ।

बुधबार एनआइसी एशिया लघुवित्तको सबैभन्दा धेरै २२ करोड ३६ लाख रुपैयाँ बराबरको शेयर कारोबार भएको छ भने एनसिसि बैंकको १९ करोड ४७ लाख, अपि पावरको १८ करोड २७ लाख र जनउत्थान सामुदायिक लघुवित्तको १५ करोड २३ लाख रुपैयाँ बराबरको शेयर कारोबार भएको छ ।