राजनीति

अहिलेको राजनीतिक परिस्थिति फेरिन सक्छ : केपी शर्मा ओली

• गाउँ सहर संवाददाता
• २ फाल्गुण मंगलबार, २०७९ | १६:३६:०० मा प्रकाशित

काठमाडाैँ । नेकपा (एमाले) का अध्यक्ष केपी शर्मा ओलीले देशको अहिलेको राजनीति स्थिति फेर्न देशभित्र र बाहिरका अनेक शक्ति क्रियाशील रहेको बताएका छन् ।

मंगलबार काठमाडौँमा एमालेको विद्यार्थी संगठन अनेरास्ववियूको २३ औं महाधिवेशन उद्घाटनमा बोल्दै ओलीले अहिलेको राजनीतिक परिस्थिति फेरिन सक्ने बताए ।

उनले भने, ‘हामीले तत्कालीन पाँच दलीय गठबन्धन तोडेर नयाँ सरकार बनायौं । त्यो देखेर धेरै साथीहरू प्रशन्न हुनुहुन्छ, प्रशन्न हुनु पनि पर्छ । तर भोलि यो स्थिति फेरियो भने…’ राजनीतिमा धेरै उतारचढाव हुन्छ । अहिले पनि देशभित्र र बाहिरका अनेक शक्ति यहाँ स्थिरता हुन नदिन र देशलाई बर्बाद पार्न क्रियाशील छन् ।’

आफू सरकारमा हुँदा नेकपाभित्रकै मानिसहरूका कारण नेकपा फुटेको भन्दै उनले त्यतिबेला बाहिर-भित्रबाट प्रहार भएकाे बताए ।

अध्यक्ष ओलीले भने, ‘जसरी विभिषण नभएको भए रामले रावणलाई पराजित गर्न सक्ने थिएनन् । त्यसैगरी एमालेभित्र पनि त्यस्ता केही मानिस नभएको भए उनीहरू पराजित गर्न सक्दैनथे होला ।’