गाउँ सहर

दुर्घटनाग्रस्त विमानमा यस्तो रेकड रहने ब्ल्याक बक्स फेला

• विष्णुहरि पाैडेल
• २ माघ सोमबार, २०७९ | १३:५५:०० मा प्रकाशित

पोखरा । पोखरामा आइतवार दुर्घटना भएको यति एयरलायन्सको जहाजको ब्ल्याक बक्स फेला परेको छ । 

दुर्घटनासँगै आइतबार दिउँसोबाट उद्धार कार्य निरन्तर जारी रहेकोमा आज मात्रै ब्ल्याक बक्स फेला परेको नागरिक उड्डयन प्राधिकरणका प्रवक्ता जगन्नाथ निरौलाले जानकारी दिए ।

ब्ल्याक बक्स जहाजको महत्वपूर्ण उपकरण भएकोले दुर्घटना हुनुभन्दा  दुई घण्टा अघिसम्मका आवाज रेकर्ड हुन्छन् । विमानभित्रका सबै आवाज रेकर्ड हुने ब्ल्याक बक्स जस्तोसुकै दुर्घटनामा पनि सुरक्षित रहन्छ । आगोले जलाउन नसक्ने यो उपकरण पानीमा डुबेपनि रेकर्डहरू सुरक्षित हुन्छन् । यसका आधारमा दुर्घटनाको कारण पत्ता लगाउन सहज हुन्छ । ब्ल्याक बक्समा इन्जिनको आवाजसँगै क्याविन, ककपिट आदिको आवाज रेकर्ड हुने भएकोले दुर्घटनाका समयमा जहाज कस्ता अवस्थामा थियो भन्ने यसबाट पत्ता लाग्दछ ।

त्यस्तै निधन भएका विमान चालक दलका सदस्य, विदेशी नागरिक र काठमाडौँ घर भएकाहरुको शव काठमाडौँ ल्याइने भएको छ ।  दुर्घटनामा निधन भएकामध्ये पोखराका नागरिकको हकमा पोखरामै पोस्टमार्टम गरी आफन्तको जिम्मा लगाइनेछ भने काठमाडौँ ल्याइने शवको हकमा काठमाडौँमै पोस्टमार्टम गरिनेछ । 

दुर्घटनाको कारण हालसम्म पत्ता नलागेको उड्डयन प्राधिकरणका प्रवक्ता जगन्नाथ निरौलाले जानकारी दिए । आवश्यक प्रकृया पुरा भएपछि मात्र शब आफन्त लाई हस्तान्तरण गरिने बताइएको छ ।

आइतबार बिहान काठमाडौंबाट पोखराका लागि उडेको यती एयरलाइन्सको कल साइन ‘नाईन एन–एनएसी’ ६९१ उडानको एटीआर–७२ विमान अवतरण हुनुअघि पोखराको सेती खोँचमा दुर्घटनाग्रस्त भएको थियो । विमानमा चालक दलका चार सदस्य र ६८ यात्रु गरी ७२ जना सवार थिए ।