अर्थतन्त्र

गत साता सेयर बजारको परिसूचक नेप्से समग्रमा ७६ अंकले घट्याे, काराेबार रकमपनि उस्तै

• गाउँ सहर संवाददाता
• २८ श्रावण शनिबार, २०७९ | ०७:२९:०० मा प्रकाशित

काठमाडौँ । यो साता सेयर बजारको परिसूचक नेप्से समग्रमा ७६ अंक घटेको छ । गत साता २११३ अंकमा रहेको नेप्से यो साता २०३७ अंकमा रहेर बन्द भयो । नेप्से एक दिन बढ्दा ४ दिन घटेको छ ।

साताको पहिलो दिन आइतबार परिसूचक नेप्से १०.२७ अंक बढ्यो । सो अंकको वृद्धिपछि नेप्से २१२३ अंकमा पुगेको थियो । दोस्रो दिन सोमबार फेरि नेप्से १७.६७ अंक घटेर २१०६ अंकमा झऱ्यो । मंगलबार ४३.३५ अंक घट्यो भने बुधबार थप ५.११ अंक घटेपछि नेप्से २०५७ अंकमा ओर्लियो । बिहीबार १९ अंक घटेसँगै यो साता २०३७ अंकमा नेप्से राेकियो ।

नेप्सेसँगै कारोबार रकम साताको पछिल्ला दिनमा उच्च दरले घट्यो । आइतबार २ अर्ब ६७ करोड रुपैयाँको सेयर कारोबार भएकोमा सोमबार २ अर्ब ८५ करोड र मंगलबार २ अर्ब ८१ करोड रुपैयाँको कारोबार भयो । बुधबार १ अर्ब ९३ करोडमा झरेको कारोबार बिहीबार १ अर्ब ७६ करोडमा खुम्चियो ।

कारोबार रकम घट्नुले सेयर खरिदमा लगानीकर्ताको उत्साह नरहेको र बेच्नेहरु पनि धेरै नआत्तिएको संकेत गर्छ । यो साता कारोबार रकमका आधारमा शिवम् सिमेन्ट, हिमालयन डिस्टिलरी, नबिल बैंक, हिमालयन एभरेष्ट इन्स्योरेन्स तथा नागरिक लगानी कोष अगाडि रहे ।