अर्थतन्त्र

७७ अंकले घटेकाे बजारमा ९ अर्बकाे काराेबार, नयाँ लगानीकर्ता घाटा खाएर बाहिरिने अवस्थामा

• गाउँ सहर संवाददाता
• ३१ भदौ बिहीबार, २०७८ | १५:५५:०० मा प्रकाशित

काठमाडाैं । साताको अन्तिम कारोबार दिन नेप्से परिसूचक राताम्मे भएकाे छ । 

यसदिन नेप्से २.६५ प्रतिशत अर्थात ७६.६५ अंक घटेर २८१२.३८ विन्दुमा झरेको छ । त्यसैगरी, यस दिन सेन्सेटिभ इण्डेक्स १२.७३ अंक, फ्लोट इण्डेक्स ५.५८ अंक र सेन्सेटिभ फ्लोट इण्डेक्स ४.६३ अंक घटेको छ ।

नेप्से ओरालो लागेपनि कारोबार रकम भने बुधबारको तुलनामा केही बढेको छ । कूल २२२ कम्पनीको १ करोड ६४ लाख ६८ हजार ५०८ कित्ता सेयर ९ अर्ब ३ करोड ३९ लाख ६२३ मा कारोबार भयो ।

बैंकिङ्ग प्रणालीमा लगानीयोग्य तरलता रकम घट्नै जान थालेपछि निक्षेप बाहिरिने डरले बैंकहरुले ब्याजदर बढाउँदा त्यसको प्रत्यक्ष असर धितोपत्र बजारमा परेको छ । भदौ महिनाको अन्तिम दिन, बैंक तथा वित्तीय संस्थाहरुले ब्याजदर बढाएको सूचना प्रकाशित गरेपछि त्यसको नकारात्मक प्रभाव शेयर बजारमा परेको हाे ।

कारोबारका आधारमा अरुण भ्याली हाइड्रोपावर शीर्ष स्थानमा रहेको छ । सो कम्पनीको ३८ करोड ६० लाख ४३ हजार ५०८ बराबरको कारोबार भयो ।

मनकामना स्मार्ट लघुवित्तको शेयर मूल्यमा १० प्रतिशतले वृद्धि भई सकारात्मक सर्किट लाग्यो ।

कर्पोरेट डेभलपमेन्ट बैंक, श्री इन्भेष्ट फाइनान्स, आईसीएफसी फाइनान्स, लिवर्टी इनर्जी, चन्द्रागिरी हिल्स, गुडविल फाइनान्स, सिनर्जी पावर, युनियन हाइड्रोपावर, सप्तकोशी डेभलपमेन्ट बैंक, र बरुण हाइड्रोपावर लगायतकाे शेयरमूल्य घटेको छ ।

बजारमा प्राथमिकबाट दोस्रो बजारमा छिरेका नयाँ लगानीकर्ता शेयर बजारबाट घाटा खाएर बाहिरिने अवस्थामा पुगेका छन् ।