गाउँ सहर

निर्वाचन आयोगद्वारा मध्यावधि चुनावका कार्यक्रम सार्वजनिक, कांग्रेस किन रिसायाे ?

काठमाडाैँ । निर्वाचन आयोगले सोमवार मध्यावधि चुनावका कार्यक्रम सार्वजनिक गरेको छ ।

आयोगका प्रवक्ता राजकुमार श्रेष्ठका अनुसार दुई चरणको निर्वाचन कार्यक्रममा उम्मेदवारी मनोनयन दर्तादेखि मतगणनासम्मका बुँदा समेटिएका छन् ।

आयोगले असार ३१ गतेदेखि साउन १५ गतेसम्म निर्वाचन प्रयोजनका लागि राजनीतिक दल दर्ताको समय दिएको छ ।

दुवै निर्वाचन प्रणाली अर्थात् पहिलो हुने निर्वाचित हुने र समानुपातिक निर्वाचन प्रणालीतर्फको मतगणना मङ्सिर ३ गते नै शुरू गरिने आयोगको कार्यक्रममा उल्लेख छ ।

मन्त्रिपरिषद्‌को सिफारिसमा गत महिना राष्ट्रपति विद्यादेवी भण्डारीले प्रतिनिधिसभा विघटन गर्दै कार्तिक २६ गते पहिलो चरणको र मङ्सिर ३ गते दोस्रो चरणको निर्वाचन घोषणा गरेकी थिइन् ।

निर्वाचन कार्यक्रम सार्वजनिक गरेलगत्तै प्रमुख प्रतिपक्षी दल नेपाली कांग्रेस रिसाएकाे छ । उसले सर्वोच्च अदालतको फैसलाको पूर्वसन्ध्यामा सरकारलाई मद्दत पुर्‍याउने खालको काम उचित नभएकाे भन्दै यसले आयोग सरकारको प्रभावमा बढ्न चाहेको बताएकाे छ ।

गाउँ सहर संवाददाता