स्वास्थ्य

गत २४ घण्टामा काेराेनाका कारण २३ जनाकाे मृत्यु, निकाे हुनेकाे प्रतिशत ९४.६, सघनमा ५७१ र भेन्टिलेटरमा १८० जनाकाे उपचार हुँदै

• गाउँ सहर संवाददाता
• २१ असार सोमबार, २०७८ | १८:५१:०० मा प्रकाशित

काठमाडाैँ । नेपालमा गत २४ घण्टामा २ हजार ६२२ जना कोरोनाभाइरस सङ्क्रमित थपिएका छन् । विभिन्न मितिमा सेनाले शव व्यवस्थापन गरेको सहित २३ जनाको मृत्यु भएको स्वास्थ्य तथा जनसङ्ख्या मन्त्रालयले जनाएको छ ।

नेपालमा कुल कोभिड सङ्क्रमितको सङ्ख्या ६ लाख ४६ हजार ३६७ पुगेकाे छ भने मृत्यु हुनेको सङ्ख्या ९ हजार २४८ पुगेकाे छ । केही दिन यता सङ्क्रमितहरूको सङ्ख्या घटेको छ । तर परीक्षण पनि घटाइएको छ । यस्तै निकाे हुनेकाे संख्या ६ लाख ११ हजार १२९ छ । निकाे हुनेकाे प्रतिशत ९४.६ छ ।

पछिल्लो २४ घण्टामा लगभग ७५०० को पीसीआर विधिबाट र ४ हजार भन्दा केही बढीको एन्टिजन विधिबाट परीक्षण गरिएको जनाइएको छ । नेपालमा सङ्क्रमितमध्ये करिब ४० प्रतिशत महिला छन् भने ६० प्रतिशत पुरुष रहेका छन् ।

पछिल्लो समय सबभन्दा बढी सङ्क्रमित हुने उमेर समूह २० देखि ४० को रहेको छ । हाल २२,९९८ जना घरमै आइसोलेशनमा रहेका र २,६९२ जना संस्थागत आइसोलेशनमा रहेका स्वास्थ्य मन्त्रालयले जनाएको छ । अहिले क्वारेन्टाइनमा रहनेकाे संख्या २१७ रहेकाे छ ।

त्यसैगरी सघन उपचार कक्षमा ५७१ जना र भेन्टिलेटरमा १८० जना रहेको तथ्याङ्क मन्त्रालयसँग छ ।