गाउँ सहर

दशैँमा अधिकांश स्थानको मौसम सफा रहने, पहाडी र हिमाली क्षेत्रमा वर्षा तथा हिमपातको सम्भावना

• गाउँ सहर संवाददाता
• ३० असोज शुक्रबार, २०८३ | २०:१२:०० मा प्रकाशित

काठमाडौँ। यस वर्षको दशैँ अवधिमा देशभरको मौसम मुख्यतया सफा रहने अनुमान गरिएको छ। नेपालबाट मनसुन बाहिरिइसकेकाले पश्चिमी वायुको आंशिक प्रभाव मात्र रहने र देशका अधिकांश स्थानमा मौसम अनुकूल रहने जल तथा मौसम विज्ञान विभागले जनाएको छ।

विभागका मौसमविद् डेभिड ढकालका अनुसार दशैँ अवधिमा देशका अधिकांश भूभागमा मौसम सामान्यतया अनुकूल रहने भए पनि कोशी, बागमती र गण्डकी प्रदेशका पहाडी तथा हिमाली क्षेत्रमा हल्का वर्षा र हिमपातको सम्भावना छ। त्यसैले विशेषगरी पहाडी तथा हिमाली क्षेत्रमा यात्रा गर्नेहरूले मौसमको अवस्थालाई ध्यान दिनुपर्ने देखिएको छ।

विभागका अनुसार फूलपाती अर्थात् असोज ३१ गते देशका पहाडी भूभागमा आंशिक बादल लाग्नेछ। कोशी, बागमती र गण्डकी प्रदेशका हिमाली क्षेत्रमा साधारणतया बादल लाग्ने तथा अन्य प्रदेशका हिमाली भूभागमा आंशिक बादल लाग्ने सम्भावना छ। मधेशसहित कोशी, बागमती र गण्डकी प्रदेशका तराई क्षेत्रमा पनि आंशिक बादल लाग्नेछ भने लुम्बिनी र सुदूरपश्चिम प्रदेशका तराई क्षेत्रमा मौसम मुख्यतया सफा रहने अनुमान छ।

फूलपातीका दिन देशका हिमाली भूभाग तथा कोशी, बागमती र गण्डकी प्रदेशका पहाडी क्षेत्रका एक–दुई स्थानमा मेघगर्जन र चट्याङसहित हल्का वर्षा तथा हिमपात हुन सक्ने विभागले जनाएको छ। रातिको समयमा पनि हिमाली क्षेत्रमा आंशिक बादल लाग्नेछ। कोशी, गण्डकी र कर्णाली प्रदेशका हिमाली भूभागका एक–दुई स्थानमा हल्का वर्षा तथा हिमपातको सम्भावना छ। यसैगरी, तराईका केही स्थानमा बिहानपख हुस्सु तथा कुहिरो लाग्न सक्नेछ।

अष्टमी अर्थात् कात्तिक १ गते पनि देशका हिमाली तथा पहाडी भूभागमा आंशिक बादल लाग्ने सम्भावना छ। मधेश तथा कोशी, बागमती र गण्डकी प्रदेशका तराई क्षेत्रमा आंशिक बादल लाग्नेछ भने लुम्बिनी र सुदूरपश्चिम प्रदेशका तराई क्षेत्रमा मौसम मुख्यतया सफा रहने अनुमान गरिएको छ। अष्टमीका दिन पनि हिमाली भूभाग तथा कोशी, बागमती र गण्डकी प्रदेशका पहाडी क्षेत्रका एक–दुई स्थानमा मेघगर्जन र चट्याङसहित हल्का वर्षा तथा हिमपात हुन सक्नेछ।

अष्टमीको राति कोशी, बागमती, गण्डकी र लुम्बिनी प्रदेशका हिमाली तथा पहाडी भूभागमा आंशिक बादल लाग्ने सम्भावना छ। कर्णाली र सुदूरपश्चिम प्रदेशका हिमाली तथा पहाडी भूभागमा भने मौसम मुख्यतया सफा रहनेछ। तराईका केही स्थानमा बिहानपख हुस्सु तथा कुहिरो लाग्न सक्ने विभागको पूर्वानुमान छ।

त्यस्तै, कात्तिक २, ३ र ४ गते अर्थात् नवमीदेखि दशमीसम्म पनि देशका अधिकांश भूभागमा मौसम मुख्यतया सफा रहने देखिएको छ। यस अवधिमा कोशी, बागमती र गण्डकी प्रदेशका हिमाली तथा पहाडी क्षेत्रका साथै कर्णाली र सुदूरपश्चिम प्रदेशका हिमाली भूभागमा आंशिक बादल लाग्ने सम्भावना छ। यी दिनमा पनि सम्बन्धित प्रदेशका हिमाली तथा पहाडी क्षेत्रका केही स्थानमा हल्का वर्षा तथा हिमपात हुन सक्ने विभागले जनाएको छ।

समग्रमा यस वर्षको दशैँमा देशका अधिकांश स्थानमा मौसम अनुकूल रहने अनुमानले टीका, जमरा र पारिवारिक भेटघाटका लागि यात्रा गर्नेहरूलाई सहज हुने देखिएको छ। यद्यपि, पहाडी तथा हिमाली क्षेत्रमा वर्षा र हिमपातको सम्भावना रहेकाले लामो दूरीको यात्रा तथा पदयात्रामा निस्कनेहरूले सावधानी अपनाउनुपर्नेछ। तराईमा बिहानपख लाग्न सक्ने हुस्सु तथा कुहिरोले पनि यातायातमा प्रभाव पार्न सक्ने भएकाले यात्रामा निस्कनुअघि मौसमसम्बन्धी अद्यावधिक सूचना हेर्न विभागले सुझाव दिएको छ।