स्वास्थ्य

कोरोनाभाइरसका कारण थप ४४ जनाको निधन, निको भए ४ हजार २०, थपिए २ हजार ७६८

• गाउँ सहर संवाददाता
• ४ असार शुक्रबार, २०७८ | १७:०४:०० मा प्रकाशित

काठमाडौँ । नेपालमा कोरोनाभाइरसको सक्रिय संक्रमितको संख्या घट्दै गएको छ । दैनिक मृतकको संख्या घटेको छ । 

नयाँ थपिने संक्रमितको संख्यापनि कम भएको छ भने निको हुने दर बढेको छ । यस्तै आइसियू र भेन्टिलेटरमा विरामीको संख्यापनि घटेको छ ।

कोरोनाभाइरसको कारण नेपालमा पछिल्लो २४ घण्टामा ४४ जनाको मृत्यु भएको छ । यो सहित कुल मृतकको संख्या ८ हजार ६४१ पुगेको छ । 

यो मृत्यु नेपाली सेनाद्वारा विभिन्न मितिमा शव व्यवस्थापन गरेका समेत हुन् । 

स्वास्थ्य तथा जनसंख्या मन्त्रालयका अनुसार पछिल्लो २४ घण्टामा दुबै विधिबाट १३ हजार ३७ को परीक्षण गरिएकोमा २ हजार ७६८ नयाँ संक्रमित थपिएका छन् । 

मन्त्रालयका अनुसार पछिल्लो २४ घण्टामा ४ हजार २० जना निको भएका छन् । योसहित कुल निको हुनेको संख्या ५ लाख ४९ हजार ६८२ पुगेको छ । निको हुनेको प्रतिशत ८९ छ ।

मन्त्रालयका अनुसार अहिले देशभरमा ५९ हजार ६२४ सक्रिय संक्रमित रहेका छन् । मन्त्रालयका अनुसार देशभरका अस्पतालहरुमा ८७२ को आइसियूमा र २४६ जनाको भेन्टिलेटरमा उपचार भइरहेको छ । उसका अनुसार अहिले होम आइसोलेशनमा रहनेको संख्या ५५ हजार ३७५ र संस्थागत आइसोलेशनमा रहनेको संख्या ४ हजार २४९ छ । क्वारेन्टाइनमा रहनेको संख्या ४८९ छ ।

पछिल्लो समय कोरोना कहर बढ्दै जाँदा कोरोनाको चेन ब्रेक गर्न धेरै स्थानहरुमा कडा निषेधाज्ञा जारी गरिएको छ भने काठमाडौँ उपत्यकामा केहि खुकुलो गरिएको छ ।

पछिल्लो २४ घण्टाको तथ्याँकले पनि २१ वर्षदेखि ६० वर्ष समूहमा सबैभन्दा बढी संक्रमण देखिएको छ । 

काठमाडौँमा ७ हजार १३५, भक्तपुरमा २ हजार ३०८ र ललितपुरमा ३ हजार ७१ सक्रिय संक्रमित रहेका छन् ।

मन्त्रालयका अनुसार अहिलेसम्म पिसिआर परीक्षण ३२ लाख ५५ हजार ५७९ र एन्टिजेन परीक्षण १ लाख ३३ हजार ६२७ को गरिएको छ ।