दिगोविकास

शेयरबजारका कुरा : काराेबार रकम ह्वात्तै घट्याे, नेप्से अंक स्थिर, लगानीकर्ता सुस्ताए

• गाउँ सहर संवाददाता
• ३ असार बिहीबार, २०७८ | १५:२६:०० मा प्रकाशित

काठमाडौं । साताकाे अन्तिम दिन शेयर काराेबार रकममा ह्वात्तै गिरावट आएकाे छ भने नेप्से अंक स्थिरजस्तै छ । नेपाल धितोपत्र बोर्डले ५१ कम्पनीको सेयरमा जोखिम रहेको बताएको पहिलाे दिन ५२ अंकले घटेकाेमा दोस्रो दिन बिहिबार कारोवार मापक नेप्से परिसूचक झिनो अंकले ओरालो लागेको छ ।

नेपाल स्टक एक्सचेञ्जका अनुसार नेप्से परिसूचक १.२९ अंकले ओरालो लागेर २ हजार ९६८.४३ मा ओर्लेको छ । यस्तै, सेन्सेटिभ परिसूचक समेत ०.५३ अंकले घटेर ५४१.१२ मा सिमित भएको छ ।

त्यस्तै, आज कारोबार रकममा पनि गिरावट आएको छ ।

कूल २२३ कम्पनीको २ करोड ३ लाख ६५ हजार ६९९ कित्ता सेयर १० अर्ब ९० करोड ४९ लाख ५८ हजार ९३५ मा खरिद बिक्री भए । हिजो बुधबार १५ अर्ब ४८ करोड ४४ लाख बराबरको कारोबार भएको थियो । 

नेप्सेका अनुसार आज एउटा कम्पनीको शेयरमूल्यमा उच्च बृद्धि भएको छ । शेयरमूल्य बढ्ने कम्पनीहरुमा खानीखोला हाइड्रोपावर कम्पनी रहेका छ । यस कम्पनीको शेयरमूल्य करिब ८ प्रतिशतले बढेको छ ।          

त्यस्तै, आज सीइडीबी हाइड्रोपावर कम्पनीका लगानीकर्ताले सर्वाधिक गुमाएका छन् भने कारोबारको आधारमा आज सबैभन्दा बढी नेपाल रि–इन्स्योरेन्स कम्पनीको भएको छ ।    

कारोवार भएका मध्ये ९६ कम्पनीको सेयर मूल्यमा गिरावट आउँदा ८१ कम्पनीको भने बढेको छ । ६ कम्पनीको सेयर मूल्यमा भने कुनै परिवर्तन भएको छैन । कारोवारका आधारमा नेपाल पुनरबीमा कम्पनी शीर्ष स्थानमा रहेको छ । सो कम्पनीको ७७ करोड ३७ लाख ३९ हजार बराबरको कारोवार भयो ।

नेप्से बढेर उच्च विन्दुमा रहेकाे र नेपाल धितोपत्र बोर्डले ५१ कम्पनीको सेयरमा जोखिम रहेको बताएपछि लगानीकर्ता सुस्ताएकाे देखिन्छ ।