गाउँ सहर

रिहा भएपछि रामकुमारी झाँक्रीले भनिन्–राष्ट्रपतिविरुद्ध बोलेकोमा पछुतो छैन

• गाउँ सहर संवाददाता
• २९ माघ बिहीबार, २०७७ | १९:२२:०० मा प्रकाशित

काठमाडौं । पाँच घण्टापछि प्रहरी हिरासतबाट रिहा भएकी प्रचण्ड–माधव समूहकी नेतृ रामकुमारी झाँक्रीले राष्ट्रपति विद्यादेवि भण्डारी विरुद्ध बोलेकोमा पछुतो नभएको बताएकी छन् ।

रिहाइपछि सञ्चारकर्मीहरुसँग कुरा गर्दै झाँक्रीले भनिन्- 'संविधानले व्यवस्था गरिएको संवैधानिक पदहरूका प्रति हाम्रो जहिले पनि हाम्रो सम्मान छ । त्यहाँ रहने व्यक्तिहरूका क्रियाकलापका प्रति आलोचना भएको हो । त्यसमा रिग्रेट गर्नुपर्ने कुरा केही पनि छैन,' उनले भनिन्, 'राष्ट्रपति सम्माननीय संस्था हाम्रो आन्दोलनद्वारा स्थापित गरिएको राष्ट्रको सर्वोच्च संस्था हो । संवैधानिक राष्ट्रपतिप्रति जहिले पनि सम्मान छ ।'

उनले आफूहरु व्यक्तिविरुद्धको नभइ प्रवृत्ति विरुद्ध लडेको बताइन् । झाँक्रीले जनदबाबका अगाडि सरकारको दमन हारेको बताइन् ।

बिहीबार साँझ मिनभवन स्थित अपराध अनुसन्धान महाशाबाट रिहा भएपछि उनले दबाबका कारण सरकार आफ्नो गलत कदम सच्याउन बाध्य भएको उल्लेख गरिन् ।

महानगरीय अपराध महाशाखाको टोलीले राज्य विरुद्धको कसुरमा अनुसन्धानका लागि भन्दै जरुरी पक्राउ पूर्जी थमाएर बिहीबार विहान उनलाई पक्राउ गरेको थियो । मीनभवनस्थित महाशाखाको कार्यालयमा झण्डै साढे ५ घण्टा राखेर साँझ उनलाई रिहा गरिएको छ ।

चौतर्फी दबाबपछि प्रहरीले विना शर्त पति पशुपति पुरीको जिम्मा लगाएको हो ।

झाँक्रीले संविधानले अभिव्यक्ति स्वन्त्रता दिएको हुनाले आफूले राष्ट्रपतिको आलोचना गर्दै भाषण गरेको बताएकी थिइन् । गोरखामा भएको एक कार्यक्रममा उनले राष्ट्रपतिको कडा आलोचना गरेकी थिइन् भने सो अभिव्यक्तिलाई लिएर प्रधानमन्त्री ओली समूहका महिला नेत्रीहरुले आपत्ति जनाउँदै उनलाई कारबाही गर्न माग गर्दै प्रधानमन्त्री र गृहमन्त्रीलाई ज्ञापनपत्र समेत बुझाएका थिए ।