सडक/यातायात

बल्खु–दक्षिणकाली हुँदै हेटौँडा जाने सवारीलाई नयाँ समयसीमा

• गाउँ सहर संवाददाता
• २७ कार्तिक शुक्रबार, २०८३ | १९:३४:०० मा प्रकाशित

काठमाडौँ । काठमाडौँको बल्खु हुँदै दक्षिणकाली मार्ग भएर हेटौँडा जाने यात्रुवाहक सवारीसाधनका लागि जिल्ला प्रशासन कार्यालय काठमाडौँले नयाँ समयसीमा तोकेको छ ।

नयाँ व्यवस्थाअनुसार उक्त रुटमा चल्ने यात्रुवाहक सवारीसाधन बेलुका ८ बजेसम्म फर्पिङस्थित प्रहरी चेकपोस्ट पुगिसक्नुपर्नेछ भने बिहान ५ बजेपछि मात्रै बल्खुबाट छुट्न पाउनेछन् ।

जिल्ला सुरक्षा समितिको निर्णयअनुसार यात्रु तथा चालकको सुरक्षा र दुर्घटना न्यूनीकरणका लागि यस्तो व्यवस्था गरिएको प्रमुख जिल्ला अधिकारी ईश्वरराज पौडेलले जारी गरेको सूचनामा उल्लेख छ ।

प्रशासनका अनुसार साँघुरो सडक, तीव्र गति, चालकको लापरवाही, अनिद्रा तथा सवारीसाधनको कमजोर यान्त्रिक अवस्थाका कारण उक्त सडक खण्डमा दुर्घटना बढ्दै गएको छ ।

प्रशासनले उक्त रुटमा सञ्चालन हुने सबै यात्रुवाहक सवारीसाधनको यान्त्रिक अवस्था जाँच गरेर मात्रै सञ्चालन गर्न निर्देशन दिएको छ । साथै, प्रहरी तथा ट्राफिक प्रहरीलाई सवारीसाधनको अनिवार्य जाँचमा कडाइ गर्न भनिएको छ ।