अर्थतन्त्र

नेप्से परिसूचक ४६ अंकले बढ्यो

• गाउँ सहर संवाददाता
• १३ कार्तिक मंगलबार, २०८१ | १६:१३:०० मा प्रकाशित

काठमाडौँ । नेपाल स्टक एक्सचेञ्ज (नेप्से) परिसूचक मंगलबार ४६.६९ अंकले बढेको छ । सोमबार २७ अंकले बढेको शेयर बजार नेप्से परिसूचक मंगलबार ४६ दशमलव ६९ अंकले बढेर दुई हजार ६ सय ९२ दशमलव शून्य पाँच बिन्दुमा पुगेको हो ।

मंगलबार सबै समूहको शेयर बढेसँगै कारोबार रकम पनि बढेको छ । सोमबार पाँच अर्ब ३४ करोडको शेयर कारोबार भएकोमा मंगलबार तीन सय १९ वटा कम्पनीका एक करोड ३३ लाख कित्ता शेयर ६ अर्ब १२ करोड रुपैयाँमा कारोबार भएको छ ।

मंगलबार सबैभन्दा धेरै समृद्धि फाइनान्स कम्पनीको २४ करोड रुपैयाँको शेयर किनबेच भयो । मंगलबार सबै समूहको शेयर बढेकोमा विकास बैंक, होटल, जलविद्युत्, बीमा, उत्पादन, माइक्रोफाइनान्स समूहको शेयर उच्च अंकले उकालो लागेको छ ।

मंगलबार सप्तकोशी विकास बैंक, सानिमा जीआईसी इन्सुरेन्स र कुथेली बुखारी हाइड्रोपावर कम्पनीको शेयर १० प्रतिशतले बढेको छ । निफ्रा ऊर्जा ऋणपत्रको शेयर भने झन्डै दुई प्रतिशतले घटेको छ ।