मानव संशाधन

श्रम बेच्न विदेसिने युवाको लर्को दशैँमा झनै बढ्याे

• गाउँ सहर संवाददाता
• १३ कार्तिक सोमबार, २०८० | ०६:५४:०० मा प्रकाशित

काठमाडौँ । नेपालीको महान् पर्व दशैँमा श्रम बेच्न विदेसिने युवाको लर्को झनै बढेकाे छ । चालु आर्थिक वर्ष २०८०/८१ को साउन, भदौ र असोज महिनामा विदेसिनेको सङ्ख्या हेर्दा सबैभन्दा धेरै असोजमा विदेश गएको तथ्यले पुष्टि गरेको हो ।

वैदेशिक रोजगार विभागका अनुसार साउन महिनामा ५५ हजार ५७५ जना श्रम स्वीकृति लिएर विदेसिए, भदौमा ५० हजार ८८४ जना र असोजमा ५६ हजार २३५ जना श्रम गरेर विदेसिएका छन् ।

चालु आवको असोजमा वैदेशिक रोजगारीमा जान श्रम स्वीकृति लिने युवाको सङ्ख्या ५६ हजार २३५ पुगेको छ । गत वर्षको असोजमा वैदेशिक रोजगारीमा जाने नेपाली युवाको सङ्ख्या ६२ हजार ७०६ थियो । यसै गरी गत आवको साउन, भदौ र असोजमा दुई लाख दुई हजार विदेसिएकामा चालु आवको पहिलो तीन महिनामा यो सङ्ख्या एक लाख ६२ हजार ९०४ जनामा झरेको छ । सो अवधिमा श्रम स्वीकृति लिएर विदेश गएकामध्ये एक लाख ४१ हजार ४४५ जना पुरुष र २१ हजार ४५९ जना महिला रहेका छन् ।