अर्थतन्त्र

२ अर्ब ६९ करोड ८० लाख रुपैयाँकाे प्याज - ‘देशबासीले यसरी खान थालियाे’

• गाउँ सहर संवाददाता
• ९ माघ सोमबार, २०७९ | ०८:५०:०० मा प्रकाशित

काठमाडौँ । चालू आर्थिक वर्षको पछिल्लो ५ महीनामा साढे २ अर्ब रुपैयाँभन्दा बढीको प्याज आयात भएको छ । भन्सार विभागकाे तथ्यांकले यसै भन्छ ।

अधिकांश भान्छामा प्रयोग हुने प्याज उत्पादन स्वदेशमै पनि ठूलो मात्रामा हुन्छ । तैपनि स्वदेशी उत्पादनले माग धान्न नसक्दा ठूलो परिमाणमा भारतलगायत मुलुकबाट आयात गर्नुपर्ने बाध्यता छ ।

विभागको तथ्यांकअनुसार चालू आर्थिक वर्ष (आव) को ५ महीना (साउन–मङ्सिर) मा नेपालले विभिन्न मुलुकबाट २ अर्ब ६९ करोड ८० लाख रुपैयाँ बराबरको ७३ हजार २ सय मेट्रिक टन प्याज आयात गरेको छ ।

आव २०७७/७८ मा ४ अर्ब ९५ करोड ८८ लाख रुपैयाँ बराबरको १ लाख २८ हजार ४ सय ५४ मेट्रिक टन प्याज आयात भएको छ । आव २०७८/७९ मा यो परिमाण बढेर १ लाख ७३ हजार ८ सय २९ मेट्रिक टन पुगेको छ । त्यसका लागि ६ अर्ब ४४ करोड ६५ लाख रुपैयाँ बाहिरिएको छ ।

नेपालमा करीब २० हजार हेक्टर जमीनमा प्याज खेती गरिन्छ । राष्ट्रिय आलु, तरकारी तथा मसला बाली विकास केन्द्रका अनुसार वार्षिक करीब साढे २ लाख मेट्रिक टनजति प्याज स्वदेशमा उत्पादन हुन्छ ।