खेल

नेपाल टी-२० : काठमाडौंले जनकपुरलाई दोस्रो पटक हरायाे

• गाउँ सहर संवाददाता
• १७ पौष आइतबार, २०७९ | १२:४०:०० मा प्रकाशित

काठमाडाैं । काठमाडौं नाइट्सले नेपाल टी-२० लिगमा आइतबार जनकपुर रोयल्सलाई दाेस्राे पटक हराएकाे छ ।

कीर्तिपुरस्थित त्रिवि क्रिकेट मैदानमा टस हारेर ब्याटिङको निम्तो पाएको काठमाडौंले निर्धारित २० ओभरमा ६ विकेट गुमाउँदै १८० रन बनाएको थियाे । काठमाडौंले दिएको १ सय ८१ रनको लक्ष्य पछ्याएको जनकपुर १९.१ ओभरमा अलआउट भएर ९० रन मात्र बनायो ।

जनकपुरका लागि ओपनर अरफुदिन असरफ,सोमपाल कामी तथा खडक बोहोरा बाहेक अन्यले दोहोरो अंकमा रन बनाउँन सकेनन् । असरफले ३३ तथा सोमपालले २१ रन बनाए । बोहोरा १० रनमा आउट भए ।

काठमाडौंका लागि अभिनास बोहोराले ४ तथा अजमतुल्लाह उमरजाईले २ विकेट लिए ।  कमलसिंह ऐरी,अनिल खरेल र बसिर अहमदले समान १/१ विकेट लिए ।

त्यसअघि पहिले ब्याटिङ गरेको काठमाडौंले २० ओभरमा ६ विकेट गुमाएर १ सय ८० रन बनाएको थियो। 

काठमाडौंका लागि सुनाम गौतमले ४७ बलमा ६२ रनको अर्धशतकीय ईनिङ खेले । रायन बर्लले ४० बलमा ४ चौका र ३ छक्काको सहयोगमा अविजित ६१ रनको अर्धशतकीय ईनिङ खेल्दा एलेक्स ब्लेक २० रनमा आउट भए । 

अजमतुल्लाह उमजाईले १० रन बनाउँदा लोकेश बम ७ रनमा अविजित रहे । कप्तान ज्ञानेन्द्र मल्ल भने यस लिगमा तेस्रो पटक डगआउट भए । 

जनकपुरका लागि जितेन्द्र मुखियाले २ तथा शरफुदिन असरफ र कप्तान ट्राभोन ग्रिफिथले समान १/१ विकेट लिए ।

पाँच खेल खेलेर समान ३ जित तथा २ हार हात पारेर ६ अंक सहित काठमाडौं अंक तालिकाको तेस्रो स्थानमा रहेको छ।

हारका बाबजुत छ खेलमा चार जित  निकालेको जनकपुर ६ खेलमा ८ अंकका साथ अंक तालिकाको दोस्रो स्थानमा कायमै रहेको छ । 

यही संस्करणको पहिलो भेटमा पनि काठमाडौंले जनकपुरलाई हराएको थियो । 

आज नै हुने दोस्रो खेलमा अल स्टार लुम्बिनी र विराटनगर सुपर किंग्सबीच खेल हुदैछ । खेल दिउसो १ बजे बाट सुरु हुनेछ।

यस प्रतियोगिताको फाईनल खेल २७ गते हुनेछ ।

डबल राउण्डमा हुने यस लिगमा ३४ खेल हुनेछ । यस लिगको विजेताले ५५ लाख पाउने जनाएको छ ।

यस्तै उपविजेताले ३० लाख नगद पुरस्कार प्राप्त गर्दा तेस्रो हुनले १० लाख र चौंथोले ५ लाख पाउने छ ।

त्यस्तै प्लेयर अफ द सिरिजले ५ लाख प्राप्त गर्दा उत्कृष्ट बलर र उत्कृष्ट ब्याटरले २ लाख ५० हजार पाउने छन् ।

इमर्जिङ प्लेयरले १ लाख ८० हजार पाउने छ ।  पहिलो संस्करणको लिगमा ६ टोलीको सहभागिता रहेको छ ।

यस लिगमा काठमाडौं नाइट,पोखरा एभेन्जर्स,फार वेस्ट युनाईटेड,जनकपुर रोयल्स,विराटनगर सुपर किंग्स र लुम्बिनी अल स्टार रहेका छन् ।