कला

नायिका प्रियंका कार्कीमाथि क्रिप्टोकरेन्सीको अवैध कारोबार गरेको आरोपमा अनुसन्धान सुरू

• गाउँ सहर संवाददाता
• ६ चैत आइतबार, २०७८ | १७:१४:०० मा प्रकाशित

काठमाडाैं । नायिका प्रियंका कार्कीमाथि प्रहरीको केन्द्रीय अनुसन्धान ब्यूरो सीआईबीले अनुसन्धान थालेको छ । डिजिटल मुद्रा ‘क्रिप्टोकरेन्सी’को अवैध कारोबार गरेको आरोपमा उनीमाथि अनुसन्धान शुरु गरेको हो ।

कार्कीमाथि अवैध क्रिप्टोकरेन्सीमा लगानी गर्न उक्साएको आरोप रहेको एक प्रहरी अधिकारीले बताएका छन् । त्योबाहेक कार्कीले क्रिप्टोकरेन्सीमा लगानी गरेको आशंकामा सीआईबीले अनुसन्धान थालेको जनाइएकाे छ । 

उनले केही समयअगाडि सामाजिक सञ्जालमार्फत भिडियो पोष्ट गरेर उनले भनेकी थिइन्, ‘क्रिप्टोकरेन्सीमा मैले लगानी गरेको छु, तपाईंहरू पनि लगानी गर्नुस् ।’

कार्कीलाई सीआईबीले सो विषयमा सोधपुछ गर्न आइतबार बोलाएको थियो । नेपाल राष्ट्र बैंकले क्रिप्टोकरेन्सी गैरकानुनी रहेको भन्दै त्यस्तो कारोबार गरेमा कानुनी कारबाही हुने चेतावनी दिएको छ ।

गतसाता मात्रै राजस्व अनुसन्धान विभागले मोरङका दुई जनाविरुद्ध अदालतमा क्रिप्टोकरेन्सीको कारोबार गरेको अभियोगमा १० करोड जरिवानाको माग गरेर मुद्दा दायर गरेको थियो ।