राजनीति

अहिले गाउँमा नेता जाँदा जनताले कुन चाहिँ चोर आएछ भन्छन् : लिङ्देन

• गाउँ सहर संवाददाता
• २४ मङ्सिर शुक्रबार, २०७८ | १५:५१:०० मा प्रकाशित

काठमाडाैं । राष्ट्रिय प्रजातन्त्र पार्टीका अध्यक्ष राजेन्द्र लिङ्देनले देशको राजनीति लिक बाहिर गएको भन्दै चिन्ता व्यक्त गरेका छन् ।

नेपाली कांग्रेसको १४ औँ महाधिवेशनमा शुभकामना दिँदै उनले देशका तीन वटै अँगहरु ठीक तरिकाले नचलेको बताएका छन् । संसद संसद् जस्तो नभएको, न्यायपालिका पनि न्यायपालिका जस्तो नभएको, सरकार पनि सरकार जस्तो नभएको उनको भनाई छ ।

उनले भने, ‘संसद संसद जस्तो छैन, राजनीति राजनीतिजस्तो छैन, अदालत अदालतजस्तो छैन’ ।

उनले अहिले राजनीति गर्ने नेताहरुप्रति जनताले पत्याउनै छोडेको समेत बताए । मेरो नाम लिऊँ कि अरु नेताको नाम लिऊँ, भो कसैको नाम नलिउँ, उनले भने, अहिले गाँउमा कोही नेता गयो भने जनताले नाम सोध्दैनन्, कुन चाँहि चोर आएछ फेरी भन्छन् ।

नेतृत्वको छवि सुधार्ने अवसरका रुपमा लिन पनि नेताहरुलाई आग्रह गर्दै उनले २०४७ सालपछि नफुटेको कुनै राजनीतिक पार्टी नभएको बताए ।

उनले भने, २०४७ सालपछि नफुटेको कुनै राजनीतिक पार्टी भएन, कान्छो विवेकशील पार्टीसमेत फुट्यो, हामी कहाँ चुक्यौँ, यो हामीले थाहा पाउनुपर्छ’ ।