राजनीति

आन्दोलनको बलमा राजसंस्था स्थापना हुन्छ : लाेहनी

सर्लाही । राप्रपाका अध्यक्ष डा. प्रकाशचन्द्र लोहनीले आन्दोलनको बलमा राजसंस्था स्थापना गर्ने बताएका छन् । 

राप्रपा सर्लाहीको जिल्ला अधिवेशनलाई मलंगवामा सम्बोधन गर्दै अध्यक्ष लाेहनीले प्रजातन्त्रको मुल आधार शक्ति सन्तुलन र नियन्त्रणको सिद्धान्तबाट कांग्रेस तथा कम्युनिष्टहरु च्युत भएका कारण प्रजातन्त्रको रक्षार्थ पनि  आन्दोलनको बलमा राजसंस्था स्थापना गरिने बताए । 

राजसंस्थाको आवश्यक रहेको कारण यो संस्था हिजोभन्दा आज झन सान्दर्भिक देखिएको बताउदै नेपाललाई हिन्दूराष्ट्र बनाउनबाट कसैले रोक्न नसक्ने लाेहनीले बताए ।

उनले मधेसवादी दलहरुसमेत असफल भएका कारण अब मुलुकको नेतृत्व राप्रपाले गर्नुपर्ने समेत बताए ।

अदालतको गाईजात्रा, निरीह संसदले प्रजातन्त्रको खिल्ली उडाएको बताउदै यो व्यवस्था असफलताको लक्ष्यण भएकोसमेत बताए ।

आउँदो अधिवेशनले राप्रपालाई सही नेतृत्व दिने बताउदै उनले कार्यकर्ताहरुलाई विवेकपूर्ण निर्णय गर्न आग्रह गरे ।

अधिवेशनले सत्य नारायण यादवको नेतृत्वमा ४१ सदस्य जिल्ला कार्यसमिति निर्विरोध चयन गरेको छ ।

कार्यक्रमलाई सांसद राजेन्द्र लिङदेल लगायतका नेताहरुले सम्वोधन गरेका थिए ।

गाउँ सहर संवाददाता