खेल

पोखरा म्याराथनमा पहिलाे हुनेले ४ लाख पाउने

• गाउँ सहर संवाददाता
• १७ कार्तिक बुधबार, २०७८ | १३:२८:०० मा प्रकाशित

काठमाडौं । १६ औं संस्करणको सफल पोखरा अन्तराष्ट्रिय म्याराथनको विजेताले ४ लाख रुपैयाँ प्राप्त गर्ने भएको छन् ।

आयोजक नेपाल भूतपूर्व खेलाडी मञ्चले बुधबार प्रेस विज्ञप्ति जारी गर्दै खुल्ला म्याराथनको विजेताले ४ लाख रुपैयाँ प्राप्त गर्ने बताएको छ ।

आयोजकले खुल्ला म्याराथनमा यो नै सर्वाधिक पुरस्कार राशी हुने बताएको छ ।

यस्तै दोस्रो हुनेले २ लाख, तेस्रोले १ लाख र चौथो हुनेले ३० हजार रुपैयाँ प्राप्त गर्ने आयोजकले जनाएको छ ।

आगामी वर्षदिन भित्र म्याराथनको अन्तराष्ट्रिय छाता एम्समा दर्ता गराउने योजना अनुसार पुरस्कार राशी १० लाख पुर्याउने लक्ष्य सहित अघि बढेको आयोजकले जनाएको छ ।

चर्चित शहरको नाममा आयोजना गरिने सिटी म्याराथनको अवधारणा अनुसार खेलकुदमार्फत पर्यटनको प्रवद्र्धन गर्ने उद्धेश्यले सुरु गरिएको पोखरा म्याराथन यस वर्ष फागुन ७ गते आयोजना हुने भएको छ ।

आयोजकले प्रतियोगिताको सफल आयोजनाका लागि २१ उपसमिति गठन गरेको जनाएको छ ।

आयोजकले म्याराथन सहित १० किलो मिटर पुरुष तथा महिला, ५ किलो मिटर छात्र, छात्रा, ह्विल चियर र दृष्टिविहिनको पुरस्कार राशीमा समेत वृद्धि गरिने बताएको छ ।

प्रतियोगिताको कुल खर्च ९३ लाख र आम्दानी १ करोड ५ लाख हुने आयोजकको अनुमान छ ।