प्रतिनिधि सभा

प्रतिनिधिसभाको अर्को बैठक यही कात्तिक २९ गते, आज के के भए ?

• गाउँ सहर संवाददाता
• ११ कार्तिक बिहीबार, २०७८ | १४:५७:०० मा प्रकाशित

काठमाडौं । प्रतिनिधिसभाको अर्को बैठक यही कात्तिक २९ गते दिउँसो १ बजे बस्ने गरी स्थगित गरिएको छ ।

नेकपा एमालेका सांसदहरुले बैठकको सुरुमै बैठक अवरोध गरेका थिए ।

 

सभामुख सापकोटाको आसन अगाडि पुगेर उनीहरुले गैर सांसदलाई संसदमा प्रवेश निषेध गर, संवैधानिक सर्वोच्चता कायम गर, संसदीय मर्यादा कायम गर जस्ता नारा लगाए । 

तर प्रमुख प्रतिपक्षी दल नेकपा (एमाले)को अवराेबीच बसेको बैठकमा सभामुख सापकोटाले उद्योग, वाणिज्य तथा आपूर्ति मन्त्रालको जिम्मेवारी प्रधानमन्त्री शेरबहादुर देउवाले सम्हालेको जानकारीसम्बन्धी राष्ट्रपतिको कार्यालबाट प्राप्त पत्र पढेर सुनाएका थिए ।

यस्तै प्रधानमन्त्री शेरबहादुर देउवाको तर्फबाट कानुन न्याय तथा संसदीय मामिला मन्त्री दिलेन्द्रप्रसाद बडुले राष्ट्रिय दलित आयोगको वार्षिक प्रतिवेदन पेश गरेका थिए । 

 

यस्तै प्रतिनिधिसभाको बैठकमा बिरामी भएर उपचारका कारण प्रतिनिधिसभाको १३ वटा बैठकमा अनुपस्थित भएका झलनाथ खनाल, कर्मा घले र प्रदीप गिरीको अनुपस्थितिको सूचना स्वीकृत गरेको छ ।  सभामुख सापकोटाले कार्तिक २९ गते सोमबार दिनको १ बजेसम्मका लागि प्रतिनिधिसभाको बैठक स्थगित गरेका छन् ।