गाउँ सहर

ललितानिवास प्रकरणमा तानेर मेरो ५० वर्षको राजनीतिक जीवन ध्वस्त पार्ने षड्यन्त्र भयो : गच्छदार

• गाउँ सहर संवाददाता
• ६ असोज बुधबार, २०७८ | १४:४७:०० मा प्रकाशित

काठमाडौं । नेपाली कांग्रेसका नेता विजयकुमार गच्छदारले ललितानिवास प्रकरणमा तानेर आफ्नो राजनीतिक जीवन समाप्त पार्न लागिपरेको बताएका छन् ।

उनले बुधबार पत्रकार सम्मेलन गर्दै यस्तो बताएका हुन् ।

गच्छदारले राष्ट्रलाई हानी पुग्ने र आफूलाई मात्र लाभ हुन गरी कुनै गैरकानूनी काम नगरेको दावी गरेका छन् । उनले आफू निर्दोष भएको समेत दाबी गरेका छन् ।

आफू पटक-पटक उपप्रधानमन्त्री भए पनि कानूनले दिएको सुविधाबाहेक कुनै लाभ नलिएको उनको स्पष्टीकरण छ । आज पत्रकारहरूमाझ कुरा गर्दै गच्छदारले काठमाडौंमा आफू भाडाको घरमा बसिरहेको बताए ।

उनले भने, ‘यति लामो समय मन्त्री भएको नेताको काठमाडौंमा बास बस्ने आफ्नो निजी निवास पनि नभएको र भाडाको घरमा बसिरहेको कुरा सुन्दा यहाँहरूलाई आश्चर्य पनि लाग्न सक्ला तर यथार्थ यही हो ।’

गच्छदारले मन्त्रिपरिषद्ले गरेको सामूहिक निर्णयमा राजनीतिक पूर्वाग्रहले आफूलाईमात्र फसाउन खोजिएको बताए । उनले राजनीतिक पूर्वाग्रहकै कारण केही व्यक्तिलाई उन्मुक्ति दिइएको आरोप लगाए ।

उनले आफ्नो जीवन खुल्ला किताबजस्तो भएको बताए । ५० वर्षका अनवरत राजनीतिक यात्रामा आफूले कठोरभन्दा कठोर दिनहरूसँग जुधेको भन्दै उनले आफूमाथि राजनीतिक प्रतिशोध साँध्ने काम भएको दावी गरे ।