दिगोविकास

माधव नेपाल पक्षकाे पार्टीको नाम नेकपा ‘एकीकृत समाजवादी’ राख्न निवेदन

काठमाडाैं । नेकपा एमालेका वरिष्ठ नेता माधवकुमार नेपालले प्रस्ताव गर्नुभएको दल नेकपा एमाले (समाजवादी)को नाम फेरिने भएको छ । निर्वाचन आयोगमा शुक्रबार दिउँसो १ बजे निवेदन दर्ता भएको आयोगका प्रवक्ता राजेन्द्र श्रेष्ठले जानकारी दिए । उनका अनुसार नेपाल कम्युनिष्ट पार्टी (एकीकृत समाजवादी) राखेर निवेदन दर्ता भएको हो । आयोगले एमाले राख्दा मूल पार्टीसँग जुध्ने सुझाब दिएपछि नेपाल समूहले फरक नाम प्रस्ताव गरेको हो ।

 गत फागुन २३ गतेको सर्वोच्चको फैसलाले तत्कालीन नेकपा (एमाले) र नेकपा (माओवादी केन्द्र) व्यूँताएपछि सोही नाममा अर्को दल दर्ता हुन नसक्ने निर्वाचन आयोगले जनाएकाे छ । एमालेबाट अलग भएका नेता माधवकुमार नेपाल पक्षले भदौ २ गते बुधबार अलग दल दर्ताको आवेदन आयोगमा दिएको थियो । आयोगले विहीबार मात्र दल दर्तासम्बन्धी नियमावली संशाधन गरेको थियो ।

नियमावली र ऐन अनुसार नाम, झण्डा र चुनाव चिन्ह दोहोरिएर राख्न नमिल्ने व्यवस्था भएकाले एउटै नाममा दल दर्ता गर्न नमिल्नेगरी आयोगले निर्णय लिने आयोगका प्रवक्ता राजकुमार श्रेष्ठले बताए ।

नेता नेपाल अध्यक्ष रहेको पक्षले एमालेसँग मिल्नेगरी नेकपा एमाले (समाजवादी) नाम दर्ताको लागि आवेदन दिएपछि आयोगले त्यसमा पुनरविचार गर्न सो पक्षलाई आग्रह गरेको थियाे । आयोगको आग्रहअनुसार  माधव पक्षले नाम परिवर्तन गरी पुन  आवेदन दिएको हाे ।

नेपालको पार्टीको चुनाव चिह्न भने अझै टुंगो लागेको छैन ।

महन्थ पक्षकाे नयाँ दलको नाम पनि उपेन्द्र यादव अध्यक्ष रहेको दलसँग नाम मिल्न गएकाले सो पक्षलाई पनि अर्को नाम प्रस्तावसहित आवेदन दिन आयोगले आग्रह गरेको छ ।

गाउँ सहर संवाददाता

तपाईँको मत