राजनीति

एमाले अध्यक्ष ओलीले महाधिवेशन आयोजक कमिटीको बैठक बुधबार बाेलाए, खनाल-नेपाल समुह नजाने

काठमाडौं । नेकपा एमालेले आगामी असार १६ गते महाधिवेशन आयोजक कमिटीको बैठक बोलाएको छ । 

आज बिहान बसेको स्थायी कमिटी बैठकले १० औं महाधिवेशन आयोजक कमिटीको बैठक बोलाएको हो । बैठकपछि प्रवक्ता प्रदीप ज्ञवालीले पछिल्लो राजनीतिक स्थिति, कोभिड महामारी र राष्ट्रिय राजनीतिका बारेमा संक्षिप्त तर गहन छलफल भएको बताएका छन् ।

एमालेको माधवकुमार नेपाल र झलनाथ खनाल पक्षले पार्टी एकताका लागि २०७५ जेठ २ को अवस्थामा पार्टी कमिटीको बैठक बोलाउनुपर्ने माग गरिरहेका बेला ओलीले त्यसलाई बेवास्ता गर्दै आयोजक कमिटीको बैठक बोलाएका हुन् ।

आयोजक कमिटीको बैठकमा खनाल नेपाल समुह नजाने भएको छ । पार्टी एकताको प्रयास भइरहेका बेला एकपक्षीय ढंगले दशौं राष्ट्रिय महाधिवेशन आयोजक कमिटीको बैठक बोलाएर ओलीले एकताविरोधी काम गरेको भन्दै उक्त बैठकको औचित्य नभएको र ओली एकताको पक्षमा नरहेको पुष्टि भएको जनाएको छ ।

असन्तुष्ट पक्षकी नेतृ अष्टलक्ष्मी शाक्यले आयोजक कमिटीलाई सर्वोच्चले नै मान्यता नदिएको अवस्थामा त्यस्तो कमिटीको बैठक बोलाउनुको औचित्यसमेत नरहेको बताइन् ।

यसअघि सर्वोच्च अदालतले समेत आयोजक कमिटीले गरेको कारवाही मान्य नहुने यसअघि नै बताइसकेको छ । यस्तै बैठकले सर्वोच्चको उक्त निर्णयलाई गम्भीर र त्रुटिपूर्ण भनेको छ ।

प्रवक्ता ज्ञवालीले आदेश त्रुटिपूर्ण भएकाले त्यसविरुद्ध आफुहरु भ्याकेटमा गएको उल्लेख गर्दै दलको आन्तरिक विषयमा हस्तक्षेप भएको पनि बताए । 

उनले भने, ‘जेठ २७ गते सर्वोच्च अदालतले गरेको आदेश गम्भीर र त्रुटिपूर्ण हो भन्ने हाम्रो निष्कर्ष हो। त्यसलाई बदर गराउनका लागि हामी भ्याकेटमा पनि गइसकेका छौँ ।’

 

गाउँ सहर संवाददाता

तपाईँको मत