स्वास्थ्य

कोरोनाभाइरसका कारण थप ५२ जनाको मृत्यु, निको भए ३ हजार ८२, थपिए २ हजार ८२८

• गाउँ सहर संवाददाता
• २ असार बुधबार, २०७८ | १६:३२:०० मा प्रकाशित

काठमाडौँ । नेपालमा कोरोनाभाइरसको सक्रिय संक्रमितको संख्या घट्दै गएको छ । दैनिक मृतकको संख्या घटेको छ । नयाँ थपिने संक्रमितको संख्यापनि कम भएको छ भने निको हुने दर बढेको छ । यो खुसीको खबर हो ।

कोरोनाभाइरसको कारण नेपालमा पछिल्लो २४ घण्टामा ५२ जनाको मृत्यु भएको छ । यो सहित कुल मृतकको संख्या ८ हजार ५५८ पुगेको छ । 

यो मृत्यु नेपाली सेनाद्वारा विभिन्न मितिमा शव व्यवस्थापन गरेका समेत हुन् । 

स्वास्थ्य तथा जनसंख्या मन्त्रालयका अनुसार पछिल्लो २४ घण्टामा दुबै विधिबाट १३ हजार २२ को परीक्षण गरिएकोमा २ हजार ८२८ नयाँ संक्रमित थपिएका छन् । योसहित कुल संक्रमितको संख्या  ६ लाख ३७ हजार ४३३ पुगेको छ । 

मन्त्रालयका अनुसार पछिल्लो २४ घण्टामा ३ हजार ८२ जना निको भएका छन् । योसहित कुल निको हुनेको संख्या ५ लाख ४३ हजार ५२१ पुगेको छ । निको हुनेको प्रतिशत ८८.५ छ ।

मन्त्रालयका अनुसार अहिले देशभरमा ६३ हजार २५७ सक्रिय संक्रमित रहेका छन् । मन्त्रालयका अनुसार देशभरका अस्पतालहरुमा ९०२ को आइसियूमा र २७९ जनाको भेन्टिलेटरमा उपचार भइरहेको छ । उसका अनुसार अहिले होम आइसोलेशनमा रहनेको संख्या ५७ हजार ८२६ र संस्थागत आइसोलेशनमा रहनेको संख्या ४ हजार ३११ छ । 

पछिल्लो समय कोरोना कहर बढ्दै जाँदा कोरोनाको चेन ब्रेक गर्न धेरै स्थानहरुमा कडा निषेधाज्ञा जारी गरिएको छ भने काठमाडौँ उपत्यकामा केहि खुकुलो गरिएको छ ।

पछिल्लो २४ घण्टाको तथ्याँकले पनि २१ वर्षदेखि ६० वर्ष समूहमा सबैभन्दा बढी संक्रमण देखिएको छ । 

मन्त्रालयका अनुसार ४३ जिल्लाहरुमा संक्रमणको दर ५०० माथि छ, जुन घटेको हो । काठमाडौँमा ७ हजार ३३७, भक्तपुरमा २ हजार ३२८ र ललितपुरमा ३ हजार ५७ सक्रिय संक्रमित रहेका छन् ।