शिक्षा

चिकित्सा शिक्षामा खेलाँची नगर : विवेकशील साझा पार्टी

काठमाडाैं । विवेकशील साझा पार्टीले चिकित्सा शिक्षा ऐनलाई कुल्चिँदै एक निजी मेडिकल कलेजलाई सम्बन्धन दिने प्रयास नीतिगत स्वार्थ र दलीय दाउपेच रहेकाे जनाएकाे छ ।

पार्टीले मेडिकल शिक्षाका विकृतिहरू अन्त गर्नका लागि लामो सङ्घर्षपछि २०७५ सालमा ल्याइएको चिकित्सा शिक्षा ऐनलाई कुल्चिँदै एक निजी मेडिकल कलेजलाई सम्बन्धन दिने प्रयास भइरहेको भनी आइरहेका समाचारहरूप्रति विवेकशील साझा पार्टीको गम्भीर ध्यानाकर्षण भएको जनाएकाे छ ।

"स्वायत्त हुनुपर्ने चिकित्सा शिक्षा आयोगमाथि ठाडो हस्तक्षेप गरी प्रधानमन्त्री केपी शर्मा ओलीले आयोग पदाधिकारीहरूलाई अवैध काम गर्न निरन्तर दबाब दिएको र त्यसका कारण आयोग नै धराशायी हुने अवस्थामा पुगेको भन्ने समाचारहरूले हामीलाई स्तब्ध बनाएको छ ।" 

व्यक्ति विशेषका लागि मुलुकको कानुन कुल्चँदै र नियामक निकायहरूलाई धराशायी बनाउँदै जाने शृङ्खलाले निरन्तरता पाउन नहुनेमा उक्त पार्टीले जाेड दिँदै यस्ता गतिविधिले देश दण्डहीनता र अराजकताको थप सिकार बनी संस्थाहरू असफल हुने दिशामा जाने चेतावनी दिएकाे छ ।

आज हुने भनिएको चिकित्सा शिक्षा आयोगको बैठकमा उठ्ने सबै विषयमा विधि र प्रक्रियासम्मत तरिकाले मात्रै निर्णय गर्न विवेकशील साझा पार्टील्र प्रधानमन्त्री लगायत सम्बन्धित सबैको गम्भीर ध्यानाकर्षण गराएकाे जनाएकाे छ । 

"कुनै निहित स्वार्थका लागि आयोगका आलङ्कारिक अध्यक्षले विज्ञ पदाधिकारीहरूलाई पेलेर कुनै अवैध निर्णय नगराउन् भनी खबरदारी समेत गर्दछौँ । कुनै अमुक मेडिकल कलेजले सम्बन्धन पाउने वा नपाउने भन्ने हाम्रो सरोकारको विषय हैन। जुनसुकै मेडिकल कलेज वा अस्पताल खुल्दा पनि देशको कानुनी व्यवस्था अनुकूल खुल्नुपर्छ, उक्त कलेज नीतिगत स्वार्थ र दलीय दाउपेचको सिकार हुनुहुँदैन भन्नेमा हामी स्पष्ट छौँ" प्रवक्ता शरदराज पाठकद्वारा जारी गरिएकाे विज्ञप्तिमा भनिएकाे छ । 

नेपालको मेडिकल शिक्षा र स्वास्थ्य क्षेत्रमा व्याप्त विकृतिहरू विरुद्ध, मेडिकल शिक्षा सुधारका पक्षमा डाक्टर गोविन्द केसीको आन्दोलनमा पनि समर्थन गर्दै निःशुल्क र गुणस्तरीय शिक्षा तथा स्वास्थ्य राज्यको दायित्व हुनुपर्छ भन्नेमा विवेकशील साझा पार्टीले धारणा राख्दै आएकाे छ । 

गाउँ सहर संवाददाता

तपाईँको मत