अर्थतन्त्र

शेयरबजारका कुरा : रकम र संख्यामा नयाँ रेकर्ड कायम, १७ अर्ब बढिकाे काराेबार

• गाउँ सहर संवाददाता
• १६ जेठ आइतबार, २०७८ | १५:१२:०० मा प्रकाशित

काठमाडौं । शेयरबजारमा आज काराेबार रकममा नयाँ रेकर्ड कायम भएकाे छ । 

आगामी आर्थिक वर्ष २०७८/७९ को बजेट सार्वजनिक भएको भोलिपल्ट सेयर लगानीकर्ताहरु उत्साही भएका छन् । साताकाे पहिलाे काराेबार दिन नेप्से परिसूचक १२.५४ अंकले बढेर २८२७.९३ अंकमा पुगेको छ भने कारोबार संख्या र रकममा पनि नयाँ रेकर्ड कायम भएको छ ।

यो दिनको कारोबारमा ४ करोड २६ लाख ३६ हजार ३४८ कित्ता सेयर १७ अर्ब २ करोड ८४ लाख ३२ हजार २४४ रुपैयाँ ९१ पैसामा कारोबार भएको छ । कारोबार रकम र संख्या हालसम्मकै उच्च हो ।

यो दिन १२६ कम्पनीको सेयर मूल्य बढ्दा ८७ वटा कम्पनीको सेयर मूल्य घटेको छ भने ६ वटा कम्पनीको सेयर मूल्य स्थिर छ ।

आज शेयरमूल्यमा उच्च बृद्धि हुने कम्पनीहरुमा ज्याति विकास बैंक, आँखु खोला जलविद्युत कम्पनी, घलेम्दी हाइड्रो लिमिटेड, गुडवील फाइनान्स कम्पनी, लुम्बिनी विकास बैंक, साइन रेसुङगा डेभलपमेन्ट बैंक, सोल्टी होटल लिमिटेड र ओरियन्टर होटललगायत रहेका छन् ।  

त्यसैगरी सबैभन्दा बढी गुमाउने कम्पनीहरुमा बरुण हाइड्रोपावर, हिमालय उर्जा विकास कम्पनी, मिथिला लघुवित्त वित्तीय संस्था, माउन्टेन हाइड्रो नेपाल, राइराङ हाइड्रोपावर डेभलपमेन्ट कम्पनी, सिभिल लघुवित्त, ग्रीन हाइड्रोपावर कम्पनी छन् ।

यो दिनको कारोबारमा डेभलपमेन्ट बैंकको उपसमूहमा सबैभन्दा धेरै वृद्धि देखिएको छ । उक्त उपसमूहमा ७.३९ प्रतिशतले बढेको भने फाइनान्सतर्फ ५.०८ प्रतिशत र होटल तथा पर्यटनतर्फ ४ प्रतिशतले वृद्धि भएको छ ।

आइतबारको बजारमा नेशनल हाइड्रोपावरको सबैभन्दा धेरै शेयर कारोबार भएको छ । कम्पनीको १८ लाख ७५ हजार ९९० कित्ता शेयर ४७ करोड ४० लाख ९० हजार रुपैयाँको शेयर कारोबार भएको छ ।  यसैगरी अरुण काबेली पावरको ४६ करोड ९२ लाख, युनाइटेड मोदी हाइड्रोपावरको ४१ करोड ३१ लाख, बुटवल पावरको ४१ करोड २८ लाख, र अपि पावरको ४० करोड १३ लाख रुपैयाँको शेयर कारोबारमा आएको हो ।

संस्थागत लगानीकर्ता र ब्यापारिक समुहको लगानी पनि शेयर बजारमा लगानी केन्द्रिकृत हुँदा बजारमा दिनप्रतिदिन नयाँ नयाँ रेकर्ड कायम हुन थालेको छ ।