द्रुतमार्ग निर्माणमा १८ अर्ब खर्च
- गाउँ सहर डेस्क
- १४ माघ बुधबार, २०७७ | १६:११:०० मा प्रकाशित
काठमाडौँ । द्रुतमार्ग निर्माणमा हालसम्म करिब १८ अर्ब रुपैयाँ खर्च भएको छ । नेपाली सेनाको पूर्ण व्यवस्थापनमा निर्माणाधीन आयोजना निर्माणको कुल एक खर्ब ७५ अर्ब रूपैयाँ लागतमध्ये पुस मसान्तसम्म १७ अर्ब ८३ करोड रूपैयाँ खर्च भइसकेको छ ।
आयोजनाको समष्टिगत कार्य विवरणअनुसार हाल छैटौं चरणमा चलिरहेको छ । द्रुतमार्ग निर्माणको काम हालसम्म १२ प्रतिशत सकिएको छ । हाल सुरुङ मार्गका लागि कम्पनी सर्टलिस्टिङ सकिएको छ । अब बिड डकुमेन्ट प्रदान गरेर नयाँ वर्षदेखि सुरूङ खन्ने काम सुरू हुने सेनाले जानकारी दिएको छ ।
सुरुङ बनाउन सक्षम अन्तर्राष्ट्रिय निर्माण व्यवसायी छनोट गर्न प्रिक्वालिफिकेसन आह्वान गरिएकोमा दुईवटा कम्पनी मात्र सुरूङ निर्माणका लागि योग्य देखिएका छन् ।
दुई कम्पनी चाइना स्टेट इन्जिनियरिङ लिमिटेड र पोली चाङ्ग्दा इन्जिनियरिङ कम्पनी रहेका छन् । यीमध्ये पोली चाङ्ग्दा दुवै सुरुङ प्याकेज निर्माणका लागि र चाइना स्टेट दोस्रो प्याकेजका लागि मात्र योग्य देखिएको छ । द्रुतमार्गको कुल लम्बाइ ७२.५ किमि मध्ये ३ वटा सुरुङको जम्मा लम्बाइ ६.४१ किमि र पुलहरुको लम्बाइ १०.५९ किमि रहेको छ ।
चालु आवमा पुँजीगततर्फ ८ अर्ब ८४ करोड र चालुतर्फ ९ करोड ८४ लाख गरी जम्मा ८ अर्ब ९३ करोड ८८ लाख रुपैयाँ बजेट विनियोजन भएको छ । यो आर्थिक वर्षमा सुरुङमार्ग प्याकेजको ठेक्का व्यवस्थापन भई काम सुरु गर्ने लक्ष्य राखिएको छ । यस्तै ४ किमि ढुङ्गा माटोको कार्य फर्मेसन लेभलसम्म निर्माण गर्ने योजना रहेको छ । सेनाले यो अवधिमा ८०७ रोपनी जग्गा अधिग्रहण —प्राप्ति गर्नेछ भने ११ सय ५० रुख कटान गर्ने र वृक्षरोपण कार्य नियमित राख्ने योजना बनाएको जनाएको छ ।
काठमाडौं—तराई द्रुतमार्गको कुल लम्बाइ ७२.५ किमि हुनेछ । ललितपुरको खोकनाबाट सुरु हुने द्रुतमार्ग काठमाडौँ र मकवानपुर हुँदै बाराको निजगढमा टुंगिनेछ । डीपीआरअनुसार आयोजनाको अनुमानित लागत १ खर्ब ७५ अर्ब छ । द्रुतमार्ग आयोजना आव ०८०—८१ मा निर्माण सम्पन्न गर्ने लक्ष्य रहेको छ ।
गाउँ सहर डेस्क
डेस्क गाउँ सहर डटकम टीमकाे टेवलवर्क हाे ।
- यसकारण पक्राउ परे दिल्लीका मुख्यमन्त्री अरविन्द केजरीवाल
- सरस्वतीलाई पानीमा र कमलको फूलमाथि नै किन देखाइन्छ ?
- नेपालमा २०.२७ प्रतिशत जनता गरिबीको रेखामुनि
- प्रतिपक्षी दलले बहिष्कार गरेकाे चुनावमा शेख हसिना विजयी, चौथो पटक प्रधानमन्त्री बन्ने
- विदेशिने विद्यार्थी तथा युवालाई यसरी सकिन्छ राेक्न
- आज विश्व माटो दिवस : यसकारण जोगाऔं माटो
- जाडाेमा एमालेले मध्य पहाडी लोकमार्गमा थालेकाे पदयात्राकाे सन्देश
- काठमाडाैं उपत्यकामा ‘निषेधाज्ञै निषेधाज्ञा’
- विश्वकप उपाधिका लागि आज भारत र अस्ट्रेलिया भिड्दै, बिजेता र उपबिजेताले कति रुपैयाँ पाउँछन् ?
- बहुउपयोगी गाई पुज्नुकाे महिमा, वैज्ञानिक, धार्मिक र व्यवहारिक महत्वका विविध पक्ष
प्रतिकृया दिनुहोस