खेल

राष्ट्रिय खेलकुद परिषद्ले बैंकिङ्ग कारोवार कृषि विकास बैंक मार्फत गर्ने 

• गाउँ सहर डेस्क
• १६ पौष बिहीबार, २०७७ | १४:११:०० मा प्रकाशित

काठमाडौँ । राष्ट्रिय खेलकुद परिषद्ले बैंकिङ्ग कारोवार कृषि विकास बैंक मार्फत गर्ने भएको छ । राष्ट्रिय खेलकुद परिषद् (राखेप) ले आफ्नो सम्पूर्ण बैंकिङ्ग कारोवार कृषि विकास बैंक मार्फत गर्ने भएको हो ।

देशको खेल विकासमा महत्वपूर्ण योगदान दिएको राखेप र सरकारी लगानीको कृषि विकास बैंकबीच पुस १४ गते उक्त सम्झौता भएको हो । सम्झौतापत्रमा राखेपका सदस्य–सचिव रमेशकुमार सिलवाल र कृषि विकास बैंकका प्रमुख कार्यकारी अधिकृत अनिलकुमार उपाध्यायले हस्ताक्षर गरेका छन् ।

दश वर्षे सम्झौता पत्र आदान प्रदान गदै सदस्य सचिव सिलवालले भने सहकार्यले दुवै संस्थालाई एक ठाउँमा ल्याएको छ, यसको लाभ स्वभाविक रुपमा दुवैलाई मिल्छ । बैंकका प्रमुख कार्यकारी अधिकृत उपाध्यायले नेपाली खेलकुदसँग प्रत्यक्ष रुपमा जोडिन पाउँदा संस्था गौरवान्वित भएको बताएका छन् । नेपाली खेलकुदको विकास र विस्तारमा योगदान पुर्याउने उद्देश्यले सहकार्यका लागि अगाडि बढेका हौं । उनले भने

दश वर्षको लागि भएको सम्झौतामा बैंकले राखेपका ५ वर्ष स्थायी सेवा अवधि पूरा गरेका कर्मचारीलाई बिनाधितो १५ लाख सम्म तलबी खाता कर्जा तथा सापट उपलब्ध गराउने छ । परिषद्ले संचालन गर्ने तालिम र सेमिनारमा बैंकका तालिम केन्द्र लगायतका पूर्वाधार प्रयोग गर्दा बैंकले तालिम संचालनमा जारी गरेको दरमा ५० प्रतिशत छुट दिनेछ । यस्तै राखेपले सवै बैंकिङ्ग कारोवार कृषि विकास बैंक मार्फत गर्नेछ ।

देशका ७७ जिल्लामा नेटवर्क रहेका दुई संस्था बिचको सम्वन्धले बैंकिङ्ग सेवालाई सहज वनाई वित्तीय सेवा व्यवस्थापनमा सहयोग पुग्न जाने देखिन्छ । परिषद्ले बैंक मार्फत सेवा लिदाँ सेवा शुल्कमा सहुलियत हुनेछ भने एकिकृत कारोवार गर्न सहजता हुनेछ । 

बैंकले परिषद् र परिषद्मा आवद्ध कर्मचारीलाई निःशुल्क विद्युतीय भुक्तानीका सेवा उपलब्ध गराउने छ भने संस्थागत सामाजिक उत्तरदायित्वको निश्चित रकम परिषद् मार्फत खेल क्षेत्रमा खर्च गर्नेछ । सम्झौता पत्रमा उल्लेख गरिएको छ । 

खेलकुदको विकास र विस्तारका लागि केन्द्र देखि पालिकासम्म सहमति अनुसार खेल गतिविधिमा सहकार्य गर्न सकिनेछ । बैंकले संस्थागत सामाजिक उत्तरदायित्व अन्तर्गत रहेर परिषद्लाई भौतिक सामाग्री उपलब्ध गराउन सक्नेछ । परिषद्ले संचालन गरेका कुनैपनि राष्ट्रिय तथा अन्तर्राष्ट्रिय खेलकुद प्रतियोगिताको टिकट छपाई बैंकले गरिदिनेछ । बैंकिङ कारोबारका लागि बैंकले परिषद्को बैंकिङ पार्टनर भई कार्य गर्ने बताएको छ ।

सम्झौता समारोहका परिषद्को तर्फबाट सदस्यद्धय सुवास श्रेष्ठ, सम्पन्न श्रेष्ठ, विभागिय प्रमुख कुलवहादुर थापा, डेभ वहादुर वस्नेत, मधुसुदन वस्नेत, शाखा प्रमुख, राखेप कर्मचारी संघका फनिन्द्र पौडेल लगायत अन्य पदाधिकारीेको उपस्थिति रहेको थियो । 

सोही कार्यक्रममा बैंकका तर्फबाट उप–महाप्रवन्धक यज्ञ प्रकाश न्यौपाने, विभागीय प्रमुख मीनराज पोखरेल, वाग्मती प्रदेश प्रमुख सुन्दर प्रसाद खतिवडा लगायतका पदाधिकारीहरुको उपस्थिति रहेको जनाइएको छ ।