दिगोविकास

६ सय वर्ष पुरानो वैष्णव मन्दिर 

• गाउँ सहर डेस्क
• १२ मङ्सिर शुक्रबार, २०७७ | ०५:०१:०० मा प्रकाशित

भारतको तमिलनाडुको मदुरई शहरमा अवस्थित कूडल अझगर मन्दिर प्राचीन समयदेखि नै प्रख्यात छ । मन्दिर दक्षिण भारतको एक प्राचीन र प्रमुख मन्दिरका रुपमा प्रख्यात छ । मन्दिरलाई धेरै किसिमको रङ प्रयोग गरी सजाइएको छ । मन्दिरमा ६०० वर्ष पुराना शिलालेख रहेका छन् । उक्त मन्दिर १२ देखि १४ औँ  शताब्दीका बीचमा पंडया राजवंशका राजाले बनाएका थिए । त्यसपछि विजयनगर तथा मदुरैका राजाले १६ औँ शताब्दीतिर वरपर अन्य मन्दिरको निर्माण गराएका थिए । 

यो एक वैष्णव मन्दिर हो । मन्दिरभित्र भगवान विष्णुको  सुतिरहेको मूर्ति देख्न सकिन्छ । जुन मूर्ति ग्रेनाइटबाट बनेको छ । मूर्तिको उचाइ ६ फिट रहेको छ । मूर्तिको दायाँ बायाँ श्रीदेवी र भूदेवीको प्रतिमा अवस्थित छ । जसलाई भगवान रामको राज्याभिषेक समारोहको स्थान दिइएको छ । मुख्य कुरा उक्त मन्दिरको शिरको छाँया जमिनमा पर्दैन ।

भगवान विष्णुको १०८ दिव्य स्थान मध्ये यो एक स्थान हो । भगवान विष्णु कूडल अझगरका रुपमा राक्षस सोमलाई मार्नका लागि आउने गरेको धार्मिक ग्रन्थमा उल्लेख छ ।मन्दिरको चारैतिर ग्रेनाइटले  घेरिएको छ ।  मन्दिरमा पाँच स्तरीय राजगोपुरम छ । मिन्दरका शिर आठ भागमा बनेको छ । जसमा ऋषि, दशावतार, लक्ष्मी नरसिम्हा, लक्ष्मी नारायण तथा  नारायणमूर्तिको चित्र अवस्थित छन् । मन्दिरमा नौ ग्रह देवताको मूर्ति पनि स्थापित छ । नौ ग्रहले ब्रह्माण्डमा हरेक व्यक्तिलाई प्रभाव पार्ने धार्मिक मान्यता रहिआएको छ । नौ ग्रहको दर्शन गर्नाले रोकिएका काम बन्ने जनविश्वास छ । धामिर्क ग्रन्थकाे सहयाेगमा