गाउँ सहर

कीर्तिमानी आरोही निर्मल पुर्जाको निधन

• गाउँ सहर संवाददाता
• १६ श्रावण शनिबार, २०८३ | १७:०१:०० मा प्रकाशित

काठमाडाैं । कीर्तिमानी आरोही निर्मल पुर्जा (निम्स दाइ)को निधन भएको छ। 

पाकिस्तानको ब्रोड पिक आरोहणका क्रममा हिमपहिरोमा हराइरहेका पुर्जाको निधन भएको उनको कम्पनी इलाइट एक्सपेडले जनाएको छ। कम्पनीले सामाजिक सञ्जालमार्फत पुर्जाको निधन भएको जानकारी दिएको हो। 

उनीसहित १० जना आरोही ब्रोड पिक हिमाल आरोहणका क्रममा हिमपहिरोमा परेर हराएका थिए। उनीहरूको खोजी गर्न राष्ट्रिय स्वतन्त्र पार्टी (रास्वपा)का सांसद एवं पुर्जाका व्यवसायिक साझेदार निग्मा डेभिड शेर्पा शुक्रबार पाकिस्तान गएका थिए। 

शेर्पाले पनि सामाजिक सञ्जालमार्फत पुर्जाको निधन भएको जनाएका छन्। इलाइट एक्सपेडले सेयर गरेकै सूचना उनले पनि सामाजिक सञ्जाल इन्स्टाग्राममार्फत सेयर गरेका छन्।

बिहीबार ब्रोड पिक आरोहणका क्रममा पुर्जासहित १० जना हराएका थिए। उनीहरूमध्ये चार जनाको शव शुक्रबार भेटिएको थियो। 

उनले विश्वका आठ हजार मिटरभन्दा अग्ला सबै अर्थात् १४ हिमाल केवल ६ महिनाभित्र आरोहण गरेर विश्व कीर्तिमान कायम गरेका थिए । उनको कम्पनी एलाइट एक्स्पेडिसनले पुर्जाको निधन भएको शनिबार (साउन १६) पुष्टि गरेको छ ।

उक्त कम्पनीले सामाजिक सञ्जालमा जारी गरेको विज्ञप्तिमा भनिएको छ, “अत्यन्तै गहिरो दुःख र स्तब्धताका साथ हामी पुष्टि गर्दछौँ कि निर्मल ‘निम्स दाइ’ पुर्जाले ब्रोड पिकमा गएको दुःखद हिमपहिरोपछि आफ्नो ज्यान गुमाएका छन् । हामीले यो पनि पुष्टि गरेका छौँ कि उक्त आरोहण टोलीका अरू सदस्यहरू पनि दुर्भाग्यवश जीवित रहन सकेनन् ।”

वक्तव्यअनुसार उक्त दुर्घटनामा उनका भरपर्दा आरोहण साझेदार तथा गाइड पुरबहादुर गुरुङ युक्ता र निमा शेर्पाको पनि मृत्यु भएको छ। टोलीका अन्य केही सदस्य पनि दुर्घटनामा परेर ज्यान गुमाएका छन् ।

पुर्जा यही जुलाई ३० मा एक आरोहण टोलीसँग पाकिस्तानको आठ हजार ४७ मिटर अग्लो ब्रोड पिक आरोहणका क्रममा रहेका बेला हिमपहिरोमा परेका थिए ।