गाउँ सहर

घरजग्गा कारोबारबाट एक महिनामै पौने ४ अर्ब राजस्व उठ्यो

• गाउँ सहर संवाददाता
• ३ पौष बुधबार, २०८१ | १४:४१:०० मा प्रकाशित

काठमाडौं । घरजग्गा कारोबारबाट मंसिर मात्रै ३ अर्ब ८७ करोड ४८ लाख रुपैयाँ राजस्व उठेको छ । जुन चालु आर्थिक वर्षयताकै उच्च हो ।

यसअघि साउनमा ३ अर्ब ८३ करोड ५० करोड रुपैयाँ राजस्व उठाएको भूमि व्यवस्थापन तथा अभिलेख विभागको तथ्यांक छ । भदौमा ३ अर्ब ९ करोड, असोजमा ३ अर्ब ८ करोड र कात्तिकमा २ अर्ब ७० करोड रुपैयाँ राजस्व उठेको थियो ।

भदौ लागेयता जग्गा वर्गीकरण नगर्दा मुलुकभरका ६ सय २० पालिकामा कित्ताकाट ठप्प थियो । कित्ताकाट रोकिएपछि भदौ २४ मा मन्त्रिपरिषद् बैठकले भूउपयोग (दोस्रो संशोधन) नियमावली, ०८१ संशोधन गरी भूउपयोग क्षेत्र वर्गीकरण नभएको स्थानीय तहमा ०८२ असार मसान्तसम्म चार किल्ला खुलाई कृषि क्षेत्र तोक्नुपर्ने व्यवस्था गरेको थियो ।

त्यसयता असोजमा घरजग्गा कारोबार र कित्ताकाट बढे पनि राजस्व नबढेको विभागले जनाएको थियो । कात्तिकमा समेत कारोबार र कित्ताकाट बढे पनि राजस्व अझै बढेको छैन । तर मंसिरमा घरजग्गा कारोबार र कित्ताकाटसँगै राजस्व पनि बढेको विभागले जनाएको छ ।