गाउँ सहर

तत्कालीन प्रमुख प्रशासकीय अधिकृतसहित पाँचविरुद्ध भ्रष्टाचार मुद्दा

• गाउँ सहर संवाददाता
• ७ असोज आइतबार, २०८० | १३:५८:०० मा प्रकाशित

काठमाडौं । अख्तियार दुरुपयोग अनुसन्धान आयोगले बाराको सिम्रौनगढ नगरपालिकाका तत्कालीन प्रमुख प्रशासकीय अधिकृत विश्वराज मरासेनीसहित पाँचजनाविरुद्ध भ्रष्टाचार मुद्दा दायर गरेको छ ।

सिम्रौनगढ नगरपालिका–८, कचार्वस्थित जनता माविको भवन निर्माण गर्दा उनीहरूले ६ लाख ५८ हजार ४४० रुपैयाँ अनियमितता गरेको पुष्टि भएको जनाउँदै अख्तियारले आइतबार विशेष अदालतमा मुद्दा दायर गरेको हो ।

अख्तियारले मुद्दा दायर गरेका अरू व्यक्तिमा सिम्रौनगढ नगरपालिकाका लेखा अधिकृत सर्मेन्द्रप्रसाद चौधरी, जनता माविको भवन निर्माण समितिका अध्यक्ष रामबाबुप्रसाद यादव, सचिव रामाकान्त प्रसाद र कोषाध्यक्ष किरणदेवी यादव रहेका छन् । अख्तियारले उनीहरूसँग ६ लाख ५८ हजार ४४० रुपैयाँ बिगो मागदाबी गरेको छ ।

मरासेनी र लेखा अधिकृत चौधरीले प्राविधिकले तयार गरेको मूल्यांकन र भुक्तानीका लागि स्वीकृत भएको टिप्पणीमा उल्लेख भएको भन्दा बढी रकम उपभोक्ता समितिलाई भुक्तानी दिएको अख्तियारले जनाएको छ ।