स्वास्थ्य

थप एकजना काेराेना संक्रमितको मृत्यु, ७ जना आईसीयू र ३ जना भेन्टिलेटरमा उपचाररत

• गाउँ सहर संवाददाता
• ९ बैशाख शनिबार, २०८० | १८:०९:०० मा प्रकाशित

काठमाडौं । नेपालमा कोरोना संक्रमणका कारण थप एकजनाको मृत्यु भएको छ । पछिल्लो २४ घण्टामा एक कोरोना संक्रमितको मृत्यु भएको स्वास्थ्य तथा जनसंख्या मन्त्रालयले जनाएको छ ।

मन्त्रालयका अनुसार हालसम्म नेपालमा कोरोनाका कारण १२ हजार २७ जनाको मृत्यु भएको छ ।

पछिल्लो २४ घण्टामा ७८ जनामा कोरोना संक्रमण पुष्टि भएको छ । एक हजार १४८ वटा स्वाब नमुनाको परीक्षण गरिएकामा ७८ को नतिजा पोजिटिभ आएको हो । २२४ नमुनाको पीसीआर परीक्षण गर्दा २० र ९२४ नमुनाको एन्टिजेन विधिबाट परीक्षण गर्दा ५८ जनामा संक्रमण देखिएको हो ।

पछिल्लो २४ घण्टामा देशभर ५० जना निको भएका छन् । योसँगै नेपालमा कोरोनामुक्त हुनेको संख्या नौ लाख ९० हजार १४७ पुगेको छ ।

हाल देशभर २५ संक्रमित आइसोलेसनमा छन् । अस्पतालमा रहेका कोरोना संक्रमितमध्ये सात आईसीयू र तीनजना भेन्टिलेटरमा उपचाररत छन् ।

हाल देशभर कोरोनाका सक्रिय संक्रमितको संख्या ३८३ रहेको स्वास्थ्य तथा जनसंख्या मन्त्रालयले शनिबार जनाएको छ ।