खेल

टी–ट्वान्टी क्रिकेट फिक्सिङ निष्कर्ष सहितको प्रतिवेदन : सञ्चालक नै संलग्न रहेको आशंका

• गाउँ सहर संवाददाता
• ९ माघ सोमबार, २०७९ | १६:५६:०० मा प्रकाशित

काठमाडौँ । केन्द्रीय अनुसन्धान ब्यूरो (सीआईबी) को टोलीले नेपाल टी–२० लिगमा स्पट फिक्सिङ भएको निष्कर्षसहित प्रतिवेदन बुझाएको छ । ब्यूरोका प्रहरी उपरीक्षक सञ्जयसिंह थापा नेतृत्वको टिमको समितिले नेपाल टी–ट्वान्टी लिग क्रिकेटमा ‘स्पट फिक्सिङ’ भएको निष्कर्षसहित प्रतिवेदन बुझाएको हो ।

प्रारम्भिक अनुसन्धानबाट टी–ट्वान्टी लिग क्रिकेटको व्यवस्थापन गर्ने जिम्मा पाएको कम्पनी सेभेन–३ स्पोर्टका सञ्चालक नै फिक्सिङमा संलग्न रहेको आशंका गरिएको छ ।

सीआईबीको टोलीले नेपाल टी–२० लिगमा स्पट फिक्सिङमा संलग्न भएको आरोपी पूर्वराष्ट्रिय क्रिकेटर मेहबुब आलम र राष्ट्रिय क्रिकेट टोलीका सदस्य आदिल अन्सारी लाइ पक्राउ गरेको छ । नेपाल टी–ट्वान्टी लिग क्रिकेटमा ‘स्पट फिक्सिङ’ खेल्ने खेलाडीले ५ लाखसम्म लिने गरेको सो रकम खेलाडीहरुको खातामा जम्मा भएको देखिएको प्रारम्भिक छानविनबाट थाहा भएको छ ।

नेपाल टी-ट्वान्टी लिग पुस ९ गतेबाट २७ गतेसम्म टियु क्रिकेट मैदानमा आयोजना भएको थियो । लिगमा स्पट फिक्सिङ भएको खबर बाहिरिएपछि सीआईबीले अनुसन्धान थालेको थियो ।

आलम र अन्सारी बाहेक अन्य क्रिकेटरहरुपनि पक्राउ पर्नसक्ने सम्भावना  छ । समितिले स्पष्ट फिक्सिङ भएको तथ्यसहित थप अनुसन्धान गर्न सिफारिस गरेको छ ।