राजनीति

प्रचण्डले भने- एमालेमा बीउ रोपेका छौँ, केही समयपछि फूल्छ, फल्छ

• गाउँ सहर संवाददाता
• १५ असार बुधबार, २०७९ | १२:२४:०० मा प्रकाशित

काठमाडौं । नेकपा माओवादी केन्द्रका अध्यक्ष पुष्पकलम दाहाल ‘प्रचण्ड’ले एमालेभित्र आफूले बीउ रोपेको भन्दै चाँडै नै त्यहाँभित्र पनि माओवादी विचार फुल्ने, फल्ने बताएका छन् ।

बुधबार पार्टी कार्यालयमा आयोजित पार्टी प्रवेश कार्यक्रममा एमाले भित्रका हजारौं नेता माओवादी विचारसँग नजिकिएकाे दाबी गरेका छन् । 

विप्लव नेतृत्वको नेकपाका नेताहरूलाई माओवादीमा स्वागत गर्दै अध्यक्ष प्रचण्डले केपी ओलीको नेतृत्वका कारणमात्र अहिले एमालेमा आफूले रोपेको बीउ फक्रिन नपाएको बताए ।

‘त्यहाँ बिउ रोपिएको छ । हामी माओवादीले बिउ रोपेर आएका छौं । हेर्नुहोला केही समयपछि त्यो फूल्छ, फल्छ ।’

अध्यक्ष  प्रचण्डले  विप्लव नेतृत्वको नेपाल कम्युनिष्ट पार्टीका पोलिटब्युरो सदस्य सहितका ५२ जना नेता कार्यकर्ता नेकपा (माओवादी केन्द्र) प्रवेश  गराएका छन् ।

पुनसहित शंकर बहादुर खड्का, दलबहादुर धामी र रमेश परियारलगायतका नेताहरूले गत साता मात्र नेकपाबाट सामूहिक राजीनामा दिएका थिए ।  

पुन महाकाली ब्युरो इन्चार्जसमेत हुन् । यस्तै, पूर्व केन्द्रीय सदस्य खड्का सेती ब्युरो इन्चार्ज हुन् भने धामी महाकाली इन्चार्ज हुन् । पूर्व दार्चुला तथा कञ्चनपुर जिल्ला इन्चार्जसमेत रहेका परियार हाल विशेष कमिटी सदस्य रहेका छन् ।