उद्याेग

वैशाखसम्ममा २८३ स्वदेशी र १६८ विदेशी नयाँ उद्योग दर्ता

काठमाडौँ । मुलुकमा स्वदेशी तथा विदेशी लगानीमा ४५१ उद्योग दर्ता भएका छन् । चालू आर्थिक वर्षको साउनदेखि वैशाखसम्ममा २८३ स्वदेशी र १६८ विदेशी नयाँ उद्योग दर्ता भएका हुन् ।

कोभिड–१९ को महामारी नियन्त्रणमा आएसँगै उद्योग दर्ता सङ्ख्या बढ्दै गएको हो ।

उद्योग विभागका अनुसार आव २०७८/७९ को साउनदेखि वैशाखसम्ममा स्वदेशी २८३ उद्योगमा तीन खर्ब ७८ अर्ब ३१ करोड रुपियाँ लगानी हुनेछ भने २५ हजार ६८७ जनाले रोजगारी पाउनेछन् । अघिल्लो वर्ष सो अवधिमा स्वदेशी लगानीमा २१३ उद्योग दर्ता भएका थिए । त्यसका लागि एक खर्ब ५९ अर्ब ३८ करोड चार लाख रुपियाँ लगानी गर्ने ती उद्योगबाट ११ हजार ९७१ जनालाई रोजगारी दिने प्रस्ताव पेस भएको थियो ।

चालू आर्थिक वर्षको पहिलो १० महिनामा सबैभन्दा धेरै उत्पादनमूलक उद्योग १०९ दर्ता भएका छन् । यसैगरी पर्यटन उद्योग ५१, ऊर्जामूलक र सेवामूलकमा ४२, कृषि तथा वन पैदावारमा आधारित २१, सूचना प्रविधिमा आधारित १२, पूर्वाधारमा पाँच र खनिज एक उद्योग दर्ता भएका छन् ।

गाउँ सहर संवाददाता

तपाईँको मत