अर्थतन्त्र

आज तोलामै २५ सयले बढ्याे सुनकाे मूल्य, यस्ताे छ बजार भाउ

• गाउँ सहर संवाददाता
• १२ फाल्गुण बिहीबार, २०७८ | ११:२४:०० मा प्रकाशित

काठमाडाैं । नेपाली बजारमा सुनको मूल्य आज तोलामै २५ सयले बढेको छ । 

आज छापावाल सुनको मूल्य प्रतितोला ९९ हजार रहेको छ भने तेजावी सुनको मूल्य प्रतितोला ९८ हजार पाँच सय रहेको नेपाल सुनचाँदी व्यवसायी महासंघले जनाएकाे छ । त्यस्तै, आज चाँदीको मूल्य पनि बढेको छ । आज चाँदीको मूल्य बढेर प्रतितोला १३५५ रुपैयाँ कायम भएको महासंघले जानकारी दिएकाे छ । 

सुनको मूल्यमा आएको उतार चढावको असर नेपाली बजारमा देखिएको महासंघले बताएकाे छ । 

महासंघका अनुसार गत मंसिर महिनाको तुलनामा अहिले सुनको कारोबार सुस्ताएको छ । अहिले अत्यावश्यक बाहेकका अन्य ग्राहकहरु सुन खरिदका लागि आएका छैनन ।

अहिले दैनिक करिब ३० किलोको हाराहारीमा सुनको कारोबार भइरहेको जनाइएकाे छ । गत मंसिर महिनामा सुनको कारोबार दैनिक करिब ४५ केजीसम्म हुने गरेको थियो । मंसिरमा बिहेको लगन धेरै हुने भएकाले सुन बजारमा चहलपहल र माग दुवै बढेको थियो । तर, अहिले सुनचाँदीको कारोबार सुस्ताएको छ । सुनको मूल्य तोलामै लाख रुपैयाँ पुग्न लागेकोले पनि कारोबार सुस्ताएको हुनसक्ने महासंघले बताएकाे छ ।