समाज

विमानस्थलबाट एक किलो ५५ ग्राम सुन र मोबाइलसहित तीन जना पक्राउ

• गाउँ सहर संवाददाता
• २० माघ बिहीबार, २०७८ | १५:४२:०० मा प्रकाशित

काठमाडाैं । प्रहरीले त्रिभुवन अन्तराष्ट्रिय विमानस्थलबाट एक किलो १५५ ग्राम सुन र चार वटा मोबाइलसहित तीन जनालाई पक्राउ गरेको छ ।

पक्राउ पर्नेमा रौतहट गौर नगरपालिका-१० सोबगाढाका ३२ वर्षीय सुनिलकुमार साह, मकवानपुर मनहरी नगरपालिका-७ का २८ वर्षीय नवराज परियार र सिन्धुपाल्चोक भोटेकोशी गाउँपालिका-३ का ३९ वर्षीय दावा छिरिङ शेर्पा छन् । 

दुबईबाट हिमालयन एयरमा काठमाडौं आएका साहबाट प्रहरीले ६ लाख ४० हजार बराबरको आइफोन १३ प्रो म्याक्स चार वटा बरामद गरेको थियो । त्यस्तै ३ लाख ९५ हजार २२५ रुपैयाँ बराबरको सुनको बेरूवा औंठी र सिक्री एउटा बरामद गरेको कार्यालयले जनाएको छ । 

यस्तै शेर्पाले मलद्वारभित्र लुकाएर बेलनाकार रुपमा बनाइएको अर्धठोस १ किलो ५५ ग्राम सुन प्रहरीले बरामद गरेको छ । सुनकाे मूल्य हाल ८३ लाख ३९ हजारभन्दा बढी हुन आउँछ । 

पक्राउ परेका व्यक्तिमाथि थप अनुसन्धान गर्न कार्यालयले बिहीबार त्रिभुवन विमानस्थल भन्सार कार्यालय, गौचरमा बुझाएको छ ।