वातावरण

बिग्रीयाे माैसमः न्यून चापीय प्रणालीले शनिबार, आइतबार र सोमबारसम्म नेपालभर प्रभाव पार्ने

• गाउँ सहर संवाददाता
• ७ माघ शुक्रबार, २०७८ | १५:५२:०० मा प्रकाशित

काठमाडाैँ । जल तथा मौसम विज्ञान विभाग मौसम पूर्वानुमान महाशाखाले विशेष बुलेटिन ७ हिउँद यामको विशेष मौसम अपडेट गराउँदै पश्चिमी न्यून चापीय प्रणालीको प्रभावले पश्चिमबाट शनिबार, आइतबार र सोमबार क्रमश नेपालभर प्रभाव पार्ने संभावना रहेको बताएकाे छ ।

उसका अनुसार हाल नेपालमा रहेको पश्चिमी न्युन चापिय प्रणाली कमजोर अवस्थामा रहेको र भोली शनिबार विहान देखि पश्चिम नेपालबाट प्रवेश गर्न लागेको अर्को पश्चिमी न्यून चापीय प्रणालीको प्रभावले पश्चिमबाट शनिबार, आइतबार र सोमबार क्रमश नेपालभर प्रभाव पार्ने संभावना रहेको छ । देशको सुदूरपश्चिम प्रदेश, कर्णाली प्रदेश, गण्डकी प्रदेश र लुम्बिनी प्रदेशमा सामान्य देखि पूर्ण बदली तथा बाँकी प्रदेशहरुमा आंशिक देखि सामान्य बदली रहने देखिन्छ ।

गणितीय मौसम पुर्वानुमानको परिक्षण (Experimental)  मोडल अनुसार  बिहीबार राति ११:४५ बजे देखि सोमबार विहान ११:४५ बजे सम्मको वर्षाको पूर्वानुमान निम्नानुसार रहेको महाशाखाले जनाएकाे छ ।

महाशाखाका अनुसार यस प्रणालीको प्रभावले सोमबार सम्म सुदूरपश्चिम प्रदेश, कर्णाली प्रदेश, लुम्बिनी प्रदेश र गण्डकी प्रदेशका उच्च पहाडी तथा हिमाली भू-भागहरुका धेरै स्थानहरुमा हल्का देखि मध्यम हिमपातको संभावना रहेको छ । साथै बागमती प्रदेश र प्रदेश १ को उच्च पहाडी तथा हिमाली भू-भागहरुका केहि स्थानहरूमा हल्का हिमपातको सम्भावना रहेको छ । यसका साथै सुदूर-पश्चिम प्रदेश, कर्णाली प्रदेश र लुम्बिनी प्रदेशका पहाडी र तराई भू-भागका केही स्थानहरुमा मेघ गर्जन/चटयाङसहित हल्का देखि मध्यम वर्षा तथा बाँकी प्रदेशका पहाडी तथा तराई भेगका थोरै स्थानहरुमा हल्का वर्षाको समेत सम्भावना रहेको छ । मंगलबारदेखि यो मौसम प्रणाली कमजोर हुँदै मौसममा क्रमिक रुपमा सुधार हुने देखिएको छ ।

महाशाखा भन्छ, "यो मौसमी प्रणालीका कारण हवाई क्षेत्र, पर्वतारोहण, कृषि, यातायात लगायत दैनिक जनजीवनमा समेत केही असर पर्न सक्ने साथै तापक्रममा पनि गिरावट हुन सक्ने देखिएकोले चिसोबाट बच्न र हिमपातबाट हुन सक्ने प्रभावबाट जोगिन आवश्यक सतर्कता अपनाउनु हुन अनुरोध छ । चिसो मौसममा अत्याधिक विजुलीको माग बढ्न गई नियमित प्रशारणमा प्रभाव पर्न सक्ने तथा झ्याल ढोका बन्द गरी कोठामा आगो बाल्दा आगलागी र धुवाँको कारण ज्यान जोखिममा हुन सक्ने भएकोले थप सतर्कता अपनाउनुहुन पनि अनुरोध छ ।"