वातावरण

चक्रवात ‘अर्णव’को प्रभाव नेपालभर, कोशीदेखि कर्णालीसम्म वर्षा र हिमपातको सम्भावना

• गाउँ सहर संवाददाता
• १३ कार्तिक शुक्रबार, २०८३ | ०६:५९:०० मा प्रकाशित

काठमाडाैँ। बंगालको खाडीमा विकसित चक्रवात ‘अर्णव’को प्रभाव नेपालमा देखिन थालेको छ। चक्रवात कमजोर भएर न्यूनचापीय प्रणालीमा परिणत भए पनि यसको प्रभावसँगै देशभरको मौसम बदली भएको छ।

जल तथा मौसम विज्ञान विभागका अनुसार शुक्रबार बिहान कोशी र बागमती प्रदेशका पहाडी तथा तराई क्षेत्रका केही स्थानमा हल्का वर्षा भएको छ। मधेश प्रदेशका केही स्थानमा समेत छिटपुट वर्षा भएको छ।

विभागको वेबसाइटमा उपलब्ध वर्षा अनुगमन विवरणअनुसार पछिल्लो २४ घण्टामा रोशी वर्षा मापन केन्द्रमा सबैभन्दा बढी ३५.२ मिलिमिटर वर्षा रेकर्ड भएको छ। यो तथ्यांक मापन केन्द्रको अधिकतम वर्षा हो, देशभरको औसत वर्षा भने होइन।

शुक्रबार दिउँसोदेखि वर्षाको प्रभाव थप फैलिने मौसम पूर्वानुमान छ। कोशी, मधेश, बागमती, गण्डकी र लुम्बिनी प्रदेशका अधिकांश स्थानमा मेघगर्जन र चट्याङसहित मध्यम वर्षाको सम्भावना छ। केही स्थानमा भारी वर्षा हुन सक्ने विभागले जनाएको छ।

कर्णाली र सुदूरपश्चिम प्रदेशका पहाडी तथा हिमाली क्षेत्रमा पनि वर्षा र हिमपातको सम्भावना छ। उच्च हिमाली क्षेत्रमा भारी हिमपात, हिमआँधी तथा हिमपहिरोको जोखिमसमेत औँल्याइएको छ।

वर्षाका कारण पहाडी क्षेत्रमा पहिरो, नदी तथा खोलामा पानीको बहाव बढ्ने र तराईका केही क्षेत्रमा डुबानको जोखिम हुन सक्ने देखिएको छ। सडक तथा हवाई यातायातमा समेत असर पर्न सक्ने भएकाले सतर्कता अपनाउन आग्रह गरिएको छ।

चक्रवातको प्रभाव शनिबारसम्म कायम रहने र आइतबारदेखि मौसम क्रमशः सुधार हुँदै जाने पूर्वानुमान छ।