राजनीति

काेभिडका कारण एमालेका सम्पूर्ण कार्यक्रम स्थगित

• गाउँ सहर संवाददाता
• ५ माघ बुधबार, २०७८ | ११:१७:०० मा प्रकाशित

काठमाडाैं ।नेकपा एमालेले सबै प्रकारका सार्वजनिक कार्यक्रम स्थगन गरेको छ । काेराेना संक्रमणकाे महामारी पुनः बढेको सन्दर्भमाा नेकपा एमालेले पार्टी र जनसङ्गठनका २५ जनाभन्दा बढी सहभागी हुने सबै प्रकारका सार्वजनिक कार्यक्रम स्थगन गरेको हाे ।

पार्टीका प्रदेश र जिल्ला अध्यक्षलाई आज पत्राचार गर्दै कोभिड–१९ को तेस्रो लहरसम्बन्धी नेपाल सरकारले जारी गरेको स्वास्थ्य प्रोटोकललाई ध्यानमा राखेर मातहतका पार्टीका कार्यालय सञ्चालन गर्न एमाले केन्द्रीय कार्यालयका सचिव डा भीष्मराज अधिकारीले आग्रह गरेका छन् ।

पार्टीका आन्तरिक बैठक, भेला, छलफल जस्ता कार्यक्रम आवश्यक सतर्कता अपनाई आयोजना गर्न र स्थानीय नेता–कार्यकर्ता र जनप्रतिनिधिले महामारी विरुद्ध आवश्यक सतर्कता अपनाउँदै जनताको सेवामा सक्रिय रहन पनि एमालेले आग्रह गरेको हाे ।

एमालेले माघभित्र सबै प्रदेशमा अधिवेशन र आगामी फागुन मसान्तभित्र जनसङ्गठनका महाधिवेशन सम्पन्न गर्ने कार्ययोजना अघि सारेकामा ती प्रभावित भएका छन् । गत पुस २३ गते हुन नसकेका जिल्ला अधिवेशनहरु करिब २० जिल्लाको अधिवेशन पनि अब अनिश्चितका लागि पछि सरेकाे एमालेले जानकारी दिएकाे छ ।