गाउँ सहर

१ करोड ६५ लाख भ्रष्टाचार गर्ने अधिकृतविरुद्ध मुद्दा दायर

• गाउँ सहर संवाददाता
• २४ मङ्सिर शुक्रबार, २०७८ | १२:०२:०० मा प्रकाशित

काठमाडौँ । अर्थ मन्त्रालयको तत्कालीन शाखा अधिकृत उद्वव प्रसाद थपलियाविरुद्ध मुद्दा दायर भएको छ । उनले करिब एक करोड ६५ लाख रुपैयाँ भ्रष्टाचार गरेको भन्दै मुद्दा दर्ता गरेको अख्तियार दुरुपयोग अनुसन्धान आयोगले जनाएको छ ।

अहिले अवकाश पाइसकेका थपलियाले आफू पदमा रहँदा अवैध सम्पत्ति आर्जन गरेको भन्दै अख्तियारले छानविन गरेको थियो । करिब ३५ वर्ष सार्वजनिक पदमा बसेका उनको वैध आय करिब एक करोड तीन लाख रहेको समेत आयोगले जनाएको छ ।

उनले एक करोड ६४ लाख ८९ हजार रुपैयाँ बराबरको सम्पत्ति गैरकानुनी रुपमा आर्जन गरेको पुष्टि भएको आयोगका प्रवक्ता नारायण प्रसाद रिसालले जानकारी दिएका छन् ।

उनीमाथि भ्रष्टाचार गरेको रकम बराबरको बिगो दाबी गरिएको आयोगले जनाएको छ ।