अर्थतन्त्र

थामिएन शेयरबजारकाे ओरालो यात्रा, ३७ अंककाे गिरावट

• गाउँ सहर संवाददाता
• २१ मङ्सिर मंगलबार, २०७८ | १५:४५:०० मा प्रकाशित

काठमाडौं । साेमबार सुधाराेन्मुख देखिएकाे शेयर कारोबार मापक नेप्से परिसूचक मंगलबार पुनः घटेको छ । याेसँगै नेप्से करिब साढे ७ महिना यताकै न्युन विन्दुमा पुगेको छ ।

यस दिन नेप्से परिसूचक ३७.१८ अंक घटेर २५०८.९० विन्दुमा झरेको छ । यस अघि २०७७ चैत २५ गते नेप्से २५०६.६२ विन्दुमा बन्द भएको थियो । त्यसयता, नेप्से गत कात्तिक ४ गते २५१०.७३ विन्दुमा बन्द भएकोमा यस दिन १.४६ प्रतिशत घट्दै सोभन्दा तल बन्द भएको छ ।

 निरन्तरको गिरावटपछि सोमबार सेयर बजारले केही गति लिएको थियो । बजारमा आएको गिरावटले बियरिस ट्रेन्ड समाउने हो की भन्ने चिन्तामा रहेका लगानीकर्तालाई सोमबार केही राहत मिलेको थियो । त्यो राहत २४ घन्टा पनि बित्न पाएन ।

२३१ कम्पनीको ८३ लाख ३० हजार ९३ कित्ता सेयर ३ अर्ब १२ करोड ८३ लाख ४१ हजार ७ सय रुपैयाँको सेयर किनबेच भएको छ । यो दिन कारोबार रकम पनि निकै कम रहेको छ । बजारसँगै कारोबार रकम घट्दा लगानीकर्ता निकै निरास बनेका छन् ।

कारोबारमा म्यूचुअल फण्ड बाहेक सबै समूहको उपसूचकमा गिरावट आएको छ । बैंकिङ १३.५५, विकास बैंक १४०.९५, जलविद्युत ७४.६९, फाइनान्स ९०.०८, निर्जीबन बीमा १६०.९८, जीवन बीमा ७३.९४ उत्पादन तथा प्रशोधन ९२.०३, माइक्रोफाइनान्स समूहको उपसूचक ७२.५६ अंकले घटेको छ ।

कारोबार रकमका आधारमा यस दिन प्राइम कमर्सियल बैंक शीर्ष स्थानमा रहेको छ । सो बैंकको यस दिन १२ करोडभन्दा बढीको शेयर खरिदबिक्री भएको छ । त्यसैगरी, यस दिन महालक्ष्मी विकास बैंक, आइसीएफसी फाइनान्स र अपि पावरको १० करोडभन्दा बढीको शेयर खरिदबिक्री भएको छ ।

यस दिन मूल्य बढेका कम्पनीहरुको सूचीमा अधिकांश म्युचुअल फण्डहरु रहेका छन् । मूल्य बढेका शीर्ष १० कम्पनीहरुको सूचीमा ७ वटा म्युचुअल फण्डहरु रहेका छन् । जसमध्ये सिटिजन्स म्युचुअल फण्ड २ र लक्ष्मी म्युचुअल फण्डको इकाईमूल्य ४ प्रतिशतभन्दा बढी बढेको छ ।

कारोबारमा आएको आईसीएफसी फाइनान्सको शेयरमूल्य यस दिन सर्वाधिक ७.६५ प्रतिशत घटेको छ । त्यसैगरी, यस दिन कालिका माइक्रोफाइनान्स र सिनर्जी पावरको शेयरमूल्य ६ प्रतिशतभन्दा बढी घटेको छ ।

बजारले आफ्नो पुरानै गतिलाई छोडन सकेको देखिएन ।