गाउँ सहर

जबरजस्ती करणी गरेको आरोपमा दुई युवा पक्राउ

• गाउँ सहर संवाददाता
• १४ मङ्सिर मंगलबार, २०७८ | १३:२१:०० मा प्रकाशित

काठमाडाैं । प्रहरीले एक युवती र एक बालिकालाई जबरजस्ती करणी गरेको आरोपमा पर्साबाट दुई जनालाई पक्राउ गरेको छ ।

प्रहरीले १७ वर्षीया युवतीलाई जबरजस्ती करणी गरेको आरोपमा वीरगञ्ज महानगरपालिका–७ रामटोल बस्ने २१ वर्षीय बाबु भनिने विक्रम पटेल कुर्मीलाई पक्राउ गरेको हाे । पक्राउ परेका कुर्मीले पीडित युवतीलाई अनुचित प्रभाव र दबाबमा पारी विवाह गर्ने प्रलोभन देखाई गत शुक्रबार सिर्सिया खोलाको किनारको रहरबारीमा जबरजस्ती करणी गरेको प्रहरीले जनाएको छ ।

युवतीका अभिभावकले दिएको जाहेरीको आधारमा कुर्मीलाई उनकै घरबाट पक्राउ गरिएको पर्सा प्रहरीका प्रवक्ता प्रहरी नायब उपरीक्षक ओमप्रकाश खनालले जानकारी दिएका छन् ।

यसैगरी १४ वर्षीया बालिकालाई जबरजस्ती करणी गरेको आरोपमा प्रहरीले पर्साको जिराभवानी गाउँपालिका–२ बस्ने २० वर्षीय प्रभु साह कानुलाई पक्राउ गरेको छ । प्रहरीका अनुसार कानुले गत शनिबार पीडित बालिकाका अभिभावकहरु घरमा नभएको मौका छोपी घरमै पसेर जबरजस्ती करणी गरेका थिए ।

पक्राउ परेका कुर्मी र कानु दुवैजनालाई जबरजस्ती करणी मुद्दामा अदालतबाट सात दिनको म्याद थप गराई कारबाही प्रक्रिया अघि बढाइएको प्रवक्ता खनालले बताएका छन् ।