गाउँ सहर

राष्ट्रपति भवनबाट राष्ट्रिय जनगणना २०७८ सुरु, भण्डारीबाट परिवार तथ्यांक संकलन

• गाउँ सहर संवाददाता
• २५ कार्तिक बिहीबार, २०७८ | १२:५४:०० मा प्रकाशित

काठमाडौं । राष्ट्रपति विद्यादेवी भण्डारीले राष्ट्रिय जनगणना २०७८ को औपचारिक सुरुवात गरेकी छन् ।

शितल निवासमा बिहीबार बिहान पुगेको गणकको टोलीलाई राष्ट्रपति भण्डारीले आफ्नो परिवारको तथ्यांक उपलब्ध गराउँदै राष्ट्रिय जनगणना २०७८ को औपचारिक सुरुवात गरेकी हुन् ।

राष्ट्रपति भण्डारीको पहिलो विवरण संकलन गर्दै आजदेखि देशभर १२ औँ राष्ट्रिय जनगणना सुरु भएको छ । राष्ट्रपतिको जनगणनाका लागि शीतल निवास पुगेका गणकहरुले सोधेको प्रश्नको उत्तर राष्ट्रपति स्वयंले दिएकी थिइन् । केन्द्रीय तथ्यांक विभागका महानिर्देशक नेविनलाल श्रेष्ठसहितको टोली राष्ट्रपति निवासमा पुगेको थियो ।

जनगणनाको प्रश्नावलीमा ८० वटा प्रश्न समावेश छ। देशभर गणकहरु जनताका घरघरमा पुगेर जनगणना गरिरहेका छन् ।

‘मेरो जनगणना मेरो सहभागिता’ नारासहित आजदेखि सुरु जनगणना मंसिर ९ गते सकिने छ । देशभरको जनगणना गर्न ४० हजार गणक र ८ हजार ५०० सुपरिवेक्षक खटाइएको छ ।