अर्थतन्त्र

धितोपत्र बोर्डका अध्यक्ष भीष्मराज ढुंगाना बर्खास्त

• गाउँ सहर संवाददाता
• १९ असोज मंगलबार, २०७८ | २२:४१:०० मा प्रकाशित

काठमाडौँ ।  नेपाल धितोपत्र बोर्डका अध्यक्ष भीष्मराज ढुंगाना अन्तत: बर्खास्त भएका छन् ।

मंगलवार बसेको मन्त्रिपरिषद् बैठकले सर्वोत्तम सिमेन्टको शेयर कारोबार प्रकरणमा मुछिएका ढुंगानालाई बर्खास्त गर्ने निर्णय गरेको एक मन्त्रीले  बताए । यसअघि नै अर्थमन्त्रालयले निलम्बन गरेका उनलाई गत असोज ११ गतेको मन्त्रिपरिषद् बैठकले स्पष्टीकरण सोधेको थियो ।

सरकारले उनको स्पष्टीकरण चित्तबुझ्दो नभएको भन्दै बर्खास्तीको निर्णय गरेको हो । उक्त कम्पनीको भित्री शेयर कारोबारमा संलग्न रहेको आरोपका सम्बन्धमा छानबिन गर्न गठित समितिको सुझाबका आधारमा सरकारले उनलाई बखास्त गर्ने निर्णय गरेको हो ।

कम्पनीको शेयर गैरकानूनी रूपमा किनेको आरोपमा उनी निलम्बनमा थिए। अर्थ मन्त्रालयले गठन गरेको छानबिन समितिले समेत उनलाई दोषी ठहर गर्दै अर्थमन्त्रीलाई प्रतिवेदन बुझाएको थियो ।

उक्त कम्पनीको शेयर खरीद प्रकरणमा जोडिएका नेप्सेका पूर्वप्रमूख कार्यकारी अधिकृत चन्द्रसिंह साउदले भने यसअघि नै राजीनामा दिइसकेका छन् ।

तत्कालीन प्रधानमन्त्री केपी शर्मा ओली नेतृत्वको सरकारले २०७६ पुसमा ढुंगानालाई चार वर्षका लागि बोर्डको अध्यक्षमा नियुक्त गरेको थियो ।